«Qalany qopardyń da, shaıqadyń da,
Biraq, baqyt tappadyń, baıqadyń ba?
Baqyt degen qalaǵa barǵan joq qoı,
Baqytty bolǵyń kelse, qaıt aýylǵa!»,–dep aqyndar jyrlaǵandaı keı sátterde adam janyna aýyl degen sózdiń ózi jubanysh bolary sózsiz. Al halyqtyń basym kópshiligi qalaǵa qaraı aǵylmaı, óz týǵan topyraǵynda turaqtasa, demek memlekettiń halyqqa, halyqtyń óz-ózine degen adaldyǵy bolar edi. Iá, alda saılaý kele jatyr. Saılaýda altyn qazyǵynyń qamyn oılaıtyn, «aýyl» dese júregi atoılap qoımaıtyn, qıyn-qystaý turmys-tirshiliginen aryltýǵa kómek qolyn sozatyn «Aýyl» partııasy týraly el aýzynda júrgender ne deıdi eken?! Endeshe QR parlamenti májilisiniń depýtattyǵyna kandıdat, "Aýyl" partııasynyń múshesi Dáýletkereı Kápulynyń pikirine nazar aýdaryńyzdar.
- Aýyl degen atynyń ózi adamnyń júregine jaqyn. Kindik qanym tamǵan jer aýyl bolǵandyqtan jáne sol aýyldyń qadir-qasıetin qashyryp alǵandyqtan áldeńe jasaǵym keledi de turady. Mine, osy sebepten ǵana partııa músheliginen ótip, partııa arqyly aýylǵa kómek-qolymdy sozamyn dep belsenip otyrmyn. Taıaýda ǵana aqyn-jazýshylar, qalamgerlermen birigip, «Aýylym–altyn tuǵyrym» baıqaýyn da ótkizgen edik. Osy sekildi ótkizgen ádebı konkýrstardyń basy-qasynda tabylyp júrgendikten, týǵan topyraǵymyz úshin qam-qareket jasaý, jaǵdaıyn kóterý isine aralasqym keldi. Aýyl qazaǵynyń kózindegi jasty súre aldyq pa? Mine, osy basty suraq. Jappaı qazaq qalaǵa kóship, aýyl bılik tarapynan qaraýsyz qaldy. Aýyz-sý máselesi, eginniń durys shyqpaýy, kóktemde laı keshý, qystyń kúni qar astynda qalý, mal-janǵa qolaısyzdyq, jep-shóptiń qymbattyǵy máseleleri kez-kelgen adamdy sharshatary sózsiz. Sondyqtan osy máselelerdi sheshý úshin barymyzdy salamyz. Prezıdent til máselesin, el máselesin aıtty. Ol ara-tura jıyndarda ǵana jylt etip turdy. Sonymen 30 jyl óte shyqty. Aýyl deıtin asyl qazynamyzdy sál sharshatyp aldyq. Endi bizge áreket etý kerek.
Men kókeıde júrgen birneshe usynystarymdy aıtaıyn. Alǵashqysy, til máselesi. Til – táýelsizdigimizdiń kepili, ulttyń jany. Sondyqtan basqa ult ókilderin qazaqsha sóıletý kerek. Ol úshin árıne, joǵarydaǵy dókeılerdi bulbulsha saıratýǵa tıispiz. Ózimiz tildi qadirlep turmaǵan soń, basqa ulttar da shalqaıady. Men basqa til de bilmeımin. Sondyqtan óz basym tek qazaqsha sóıleımin.
Ekinshisi, qazaq halqynyń rýhy aýyldan bastaý alatynyń umyttyrmaý. Tórt-túlik maldyń qadir-qasıetin arttyrý. Aýyl sharýashylyǵynyń kapıtalyn túzeýge jan salý. Ol úshin aýyl sharýashylyq menedjerlerin oqytý isin qolǵa alaıyq.
Úshinshisi, aýyldyń turmysyn túzeýimiz kerek. Ol úshin de qarjy men umytylys, maqsat qajet.
Tórtinshisi, ár adam – ultymyzdyń taǵdyryn quraýshysy ekenin este ustaǵany jón. Árıne, ol úshin qara shańyraǵyn, ata-ájesin, mal-janyń umytpaı, saıası saýatyn arttyryp, saılaý ýchaskesinen tabylyp, «Aýyl partııasyna» daýys berse eken deımin.
Maqalaǵa qarajat «Aýyl» Halyqtyq-Demokratııalyq
patroıttyq partııasynyń
saılaý qorynyń qarajatynan tólendi
Aqgúl AIDARBEKOVA,
«Adyrna» ulttyq portaly
