Elbasy Nursultan Nazarbaevtyń qyzy Álııa Nazarbaeva ekodúken men ekobaspahana ashty. Bul týraly Nazarbaevanyń ózi Instagram-daǵy paraqshasynda jazdy dep habarlaıdy «Adyrna» ulttyq portaly Baq.kz saıtyna silteme jasap.
Onyń jazýynsha, ekodúken men baspahana keńse taýarlaryn óndirýmen jáne satýmen aınalysady.
Keńse taýralaryn saýdalaýǵa aranalǵan ekodúken men ekobaspahana ashý ıdeıasy kezdeısoq kelgen joq. Men buǵan deıin 2022 jyly bizdiń komanda Qazaqstanda alǵashqy ekologııalyq mektepti ashady dep jazǵan edim. Sonymen, bizdiń mektepte biz ózimizden bastaımyz! Bárin! Bul degenimiz, ashanada ekologııalyq taza ónimder bolýy kerek (sondyqtan biz jylyjaıymyzdy ashamyz), synyptarda óńdelgen shıkizattan jasalǵan keńse taýarlary qoldanylýy kerek, al úlestirme materıaldar men avtorlyq quraldar eko-qaǵazǵa basyp shyǵarylady, - dep jazdy Nazarbaeva.
Buǵan qosa, ol óz jazbasynda jańadan ashqan ekodúkeniniń saýdasy jaqsy júrip jatqanyn da atap ótti.
Jobamyzdy asha salysymen-aq jasyl bıznesti qoldaıtyn kásiporyndardan, balalaryna qajetti jáne paıdaly ǵana emes, sonymen qatar tárbıelik syılyqtar bergisi keletin sanaly ata-analardan jańa jyldyq syılyqtarǵa tapsyrys alǵanymyz meni qýantty. Sondyqtan biz durys baǵytta qozǵalamyz. Biz óz kezegimizde Qazaqstannyń barlyq ekoóndirýshilerine alań berdik. Qazirdiń ózinde bizdiń saıtta 30-dan astam otandyq óndirýshiler usynylǵan, - dedi Nazarbaeva.
Esterińizge sala keteıik, jaqynda Álııa Nazarbaeva ekologııalyq mekteptiń qurylysy bastalǵanyn atap ótken bolatyn.
