Polıak boksshysy Kamıl Sheremeta (21-1, 5 KO) otandasymyz Gennadıı Golovkınmen (41-1-1, 36 KO) ótkizgen jekpe-jegindegi jeńilisine baılanysty pikir bildirdi, dep habarlaıdy "Adyrna" ulttyq portaly.
Ol Facebook jelisindegi paraqshasynda: "Barsha jankúıerler, tanystar men dostarǵa sálem. Golovkınmen jekpe-jek nátıjesin bilesizder. Qıyn bolaryn bildim, ár soqqy aýyr tıetinin. Qulaǵan saıyn turyp, aıqasty jalǵastyrǵym keldi. Jetinshi raýndtan keıin tóreshi kelip, jekpe-jekti meniń densaýlyǵym úshin toqtatamyn dedi. Bul bir jaǵynan durys sheshim. 12-shi raýndqa deıin barsam da, kezdesý nátıjesin ózgerte almas edim. Besinshi, ne altynshy raýndtan keıin qol-aıaǵym matalyp qalǵandaı boldy, aıqasqan jalǵyz júrek qana.
Golovkın - joǵary lıga. Men tek jeńilip qalǵan joqpyn, tamasha tájirıbe jınadym. Shynyn aıtqanda, osy kezdesýden jınaǵanym, aldyńǵy 21 jekpe-jekten alǵanymnan kóp. Ázirge bolashaq týraly oılap, josparlar týraly sóılegim kelmeıdi. Tamasha otbasym otyrǵan úıime oralǵym keledi, olardy ómirimnen artyq súıemin! Qoldaý úshin bárine rahmet! Ázirge demalyp, keı dúnıelerge oı júgirtkim keledi. Óıtkeni meni namystan aýyr eshteńe jaralamaıdy. Qulaq pen jaq jazylar... Minezge ne bolar eken... Degenmen, Polsha úshin degim keledi", - dep jazdy.
