Törtınşı on jyldyqta bızdı jaŋa mındetter kütıp tūr - Memleket basşysy

Ötken ärbır on jyldyq atqarǧan missiiasy tūrǧysynan ǧasyrdyŋ jügın arqalap tūr. Būl turaly Täuelsızdık künı qarsaŋynda ötken Memlekettık nagradalardy tapsyru räsımınde QR Prezidentı Qasym-Jomart Toqaev aitty, dep habarlaidy QazAqparat tılşısı. «Ötken ärbır on jyldyq atqarǧan missiiasy tūrǧysynan ǧasyrdyŋ jügın arqalap tūr. Alǧaşqy on jyldyq egemen Qazaqstannyŋ öz derbestıgın qalyptastyru kezeŋı boldy. Ekınşı on jyldyqta elımız tūǧyryn nyqtap, keregesın keŋeitıp, ırgesın bekıttı. Üşınşı on jyldyqta memleketımız şyn mänınde, kemelıne kelıp, älemdık saiasattyŋ törıne ozdy. Aldaǧy törtınşı on jyldyqta bızdı jaŋa mındetter kütıp tūr. Elımızdı ılgerı damytyp, ärbır azamattyŋ laiyqty tūrmysyn qamtamasyz etuımız kerek», - dedı Qasym-Jomart Toqaev. QR Prezidentınıŋ paiymynşa, ony jüzege asyrudyŋ basty joly – tiımdı basqaru jüiesı. «Men Joldauymda memlekettık basqarudyŋ jaŋa ülgısıne basa män bergenımdı bılesızder. Osyǧan orai, köptegen naqty şaralar atqaryluda. Jalpy, jaŋǧyrudyŋ jan-jaqty bolǧany jön. Bükıl halqymyz zaman aǧymyna ılese bıluge tiıs. Özgerısterge beiımdele alatyn jūrt qana uaqyt tynysyn döp basady. Bız bılımdı ärı bılıktı, ūqypty jäne jauapty, ısker de eŋbekqor jūrt boluymyz qajet. Būl – Ūly Abai aitqandai, «tolyq adamnyŋ» aiqyn körınısı. Oǧan qosa, ärkımnıŋ jeke qasietı men maqsaty eldık müddemen tyǧyz astasyp, patriotizmge ūlasuy kerek. Sonda ǧana memleketşıldık ideiasy basty qūndylyqqa ainalady», - dedı Memleket basşysy.