Buryn Jırınovskıı ǵana edi shańqyldap, ottaı beretin, ishindegi irińdi qusa beretin. Al sońǵy jyldary Reseıdiń tanymal tulǵalarynyń, basqasyn aıtpaǵanda, ózimizdiń Qazaqstannyń tutastyǵyna, qazaq ultynyń tarıhyna qatysty beıaýyz sózderi, arandatýshy pıǵyldaǵy jańsaq sóılemderi, shabýyldary kóbeıip ketti. Reseıdegi keıbir saıasattanýshylar men jýrnalıstterdiń bul áreketin reıtıng kóterý, qaısybir tapsyrmany oryndaý, belgili bir maqsattarǵa jetý úshin jasalǵan desek te, joǵary laýazymdy adamdardyń, depýtattar men mınıstrlerdiń tb áreketine ne deımiz?!? Bular memlekettiń ýákilderi ǵoı, resmı adamdar ǵoı! Bulardyń aýzynan shyqqan sóz belgili mólsherde sol eldiń sózi ispetti, sondyqtan buǵan beıjaı qaraýǵa bolmaıdy. Bul, bir jaǵynan, sońǵy otyz jylda Jırınovskııge salmaqty jaýap berilmeýiniń saldary!
Reseı men aramyzda qanshama kelisimshart bar, kórshilik quqyq bar, qatynastarymyz óte kóp, baılanystarymyz basqa eshbir elmen bolmaǵandaı bıik dárejede. Resmı adamdar osynyń bárin eskerip, saıası etıkany saqtap sóıleýi tıis!
Meniń oıymsha osy shabýyldarǵa dereý toqtaý salynýy tıis. Ol úshin Prezıdent Q.K. Toqaev pen Elbasy N.Á. Nazarbaev Reseı Prezıdenti V.V. Pýtınmen tikeleı sóılesip, resmı hat joldap, toqtatýy tıis, basqasha túbegeıli sheshý múmkin emes dep oılaımyn. Ánsheıinde aýyzdyǵa sóz bermeıtin bizdiń depýtattar men saıasattanýshylardyń qolynan kelmeıtin nárse bul...
