Jumys berýshilerdiń aıtýynsha, eńbek naryǵynda aǵylshyn tilin jetik meńgergen qazaq tildi mamandar jetispeıdi. Qazirgi tańda eki tildi teń dárejede ıgergen qyzmetkerlerge degen suranys áldeqaıda artqan. Dese de ondaı mamandardy daıarlaıtyn bilim ordalary joqtyń qasy. Atalǵan másele QR BǴM qarasty «ADAL BILIM» alańynda talqylandy.
«Buryn qazaqstandyq birneshe ýnıversıtette qazaq-aǵylshyn tilderin oqytatyn mamandyqtar bolǵan. Biraq olardyń ǵumyry uzaq bolmady, sebebi ol kezde naryqta suranys qazirgideı emes edi. Aǵylshyn tili kúnnen kúnge qajet bolyp kele jatqanyn baıqap otyrmyz. Qazir naryqta qostildi mamandarǵa suranys bar. Biraq sol mamandardyń ózin belgili bir salaǵa beıimdep daıarlaý qajet dep oılaımyn», - deıdi A. Baıtursynuly atyndaǵy Bilim akademııasynyń dırektory Ulan Erkinbaı.
Efırge jumys berýshi retinde qatysqan «USTAZ» kásibı jetildirý ortalyǵynyń akademııalyq dırektory Nurlan Imanǵalıev sheteldik materıaldardy qazaq tiline aýdarǵan kezde týyndaıtyn qıyndyqtar jaıly pikirin bildirdi.
«Bul máseleni jumys berýshi retinde qarastyrsam, eki problema týyndaıdy. Birinshiden, materıaldardy aýdaratyn kezde eki ese qarjy jumsaımyz. Aǵylshyn tilinen aldymen orysshaǵa, odan keıin qazaq tiline aýdarý kerek. Sebebi qazaq jáne aǵylshyn tilderin teń dárejede biletin mamandar az. Ekinshiden, aqparatty aldymen orys, keıin qazaq tiline aýdarǵanda maǵynasy ózgerip ketedi. Sondaı-aq meniń oıymsha, qazirgi tańda qazaq tili men ádebıeti pániniń muǵalimderi de aǵylshyn tilin bilgeni durys. Sebebi aǵylshyn tilin biletin muǵalimder jańashyldyqqa jaqyn, kózi ashyq bolady»,- deıdi Nurlan Imanǵalıev.
Joǵaryda atalǵan máseleni sheshý maqsatynda M.S. Nárikbaev atyndaǵy KAZGIýÝ Ýnıversıtetinde bıyl «Qazaq-aǵylshyn tili jáne lıngvıstıka» baǵdarlamasy ashylǵan. Baǵdarlama jetekshisiniń aıtýynsha, bul mamandyqqa túsken stýdentterdiń qosymsha mamandyqtardy meńgerip shyǵýǵa múmkindigi bar.
«Bul mamandyqqa UBT-ǵa «Qazaq tili jáne ádebıeti» pánin tańdaǵan túlekterdi qabyldaımyz. Abıtýrıenttiń aǵylshyn tili boıynsha deńgeıi tómen bolsa da qabyldap, basynan úıretemiz. Maqsatymyz - aǵylshyn tilinen aýdarǵanda orys tilin paıdalanbaı, birden qazaq tiline aýdaratyn mamandardy daıyndaý. Qazirgi tańda qazaq tiline qyzyǵýshylyq tanytyp jatqan sheteldik azamattar bar. Olar da orys tilin bilmegendikten qazaq tilinde bilim alady. Bul mamandyqqa túsken stýdentter «Qazaq tilin shet tili retinde oqytý», «Medılıngvıstıka» (jýrnalıstik daǵdylardy úıretý), «Aýdarma isi» sııaqty qosymsha mamandyqtardy alyp shyǵady», - deıdi M. Nárikbaev atyndaǵy KAZGIýÝ Ýnıversıteti «Qazaq-aǵylshyn tili jáne lıngvıstıka» baǵdarlamasynyń jetekshisi Aqerke Salımova.
QR BǴM «ADAL BILIM» jobalyq keńsesiniń baspasóz qyzmeti
