Úndistannyń Andhra-Pradesh shtatyndaǵy Elýrý qalasynyń bir turǵyny belgisiz aýrýdan qaıtys boldy. Taǵy 315 azamat aýrýdyń uqsas belgilerimen aýrýhanaǵa tústi, dep habarlaıdy «Adyrna» «Habar 24»-ke silteme jasap.
Dárigerlerdiń aıtýynsha, naýqastarda bas aýrýy, bas aınalý, esten taný jáne epılepsııa belgileri bar. Turǵyndar atalǵan belgilermen 5 jeltoqsannan bastap aýrýhanalarǵa túsken, al 6 jeltoqsan túnde olardyń sany 315-ke jetti, olardyń 70-i áıelder men 46-sy balalar. Paıentterdiń kópshiliginiń jaǵdaıy turaqty. Sonymen qatar paıentterden alynǵan koronavırýs testi teris nátıje kórsetken.
Qazirgi ýaqytta jergilikti densaýlyq saqtaý organdarynyń ókilderi aýrýdyń qozdyrǵyshy anyqtalmaǵanyn aıtty. Naýqastardyń sý, tamaq jáne qan synamalary zertteýge jiberildi. Sonymen birge, vedomstvo mundaı jappaı aýyrý aýanyń lastanýymen nemese sapasyz ónimdi tutynýmen baılanysty bolýy múmkin ekenin aıtýda.
«Adyrna» ulttyq portaly
