Balalarǵa bazarlyq: Danagóı qoıan

4027
Adyrna.kz Telegram

«Azııa halyqtarynyń ertegileri» ıklynan

 Bırma ertegisi

Erterekte aǵaly-qaryndasty ekeý tirshilik keshipti. Áke-sheshesi o dúnıege sapar shekkennen soń, muraǵa qalǵan ógiz ben sıyr bóliske túsedi. Aǵasy – ógizdi, qaryndasy – sıyrdy enshilep, sodan tatý-tátti tarqasady. Birshama ýaqyttan keıin álgi sıyr buzaýlaıdy. Sóıtip, aǵasynyń kózi manaǵy buzaýǵa túsip, ol ony túndeletip alyp ketedi-daǵy, ógizdiń janyna qosyp qoıady. Tań ata aıǵaı-shý, dań-duń, shań-shuń bastalady. Qaryndasy: «Buzaý – meniki!», al aǵasy: «Joq, meniki!» – degennen tanbaǵan soń, aqyry aǵaıyn aq-qarany ajyratý, tóreligin tyńdaý maqsatynda qazyǵa qarata tartady. Aǵasy qorǵaýshy esebinde qusqa, al qaryndasy qoıanǵa júginedi. Bı isti tańerteń sheshýdi uıǵarady.

Belgilengen ýaqytqa bári túgel úlgerip jetedi, tek qoıan ǵana keshigedi, qalǵany kútýmen bolady. Mine, kópten kútken qoıan da keldi. Sonda, qatal qazy oǵan syn taǵady:

– Ýa, qoıanym! Sen ýaqytty baǵalamaıdy ekensiń, taǵy ózińdi qorǵaýshymyn deısiń!

– Bunyńyz qalaı, qurmettim?! – dep qoıan aıybyn jýyp-shaıyp álek. Ýaqytty qadirleımin. Biraq bir shuǵyl sharýa shyǵyp qaldy, ǵapý etkeısiz.

– Sonda jańaǵy isiń budan da mańyzdy ma? Al, baıan et... – dep tergedi, bı.

– Iá, myrzam! – dedi qoıan. Eldiń egistigi órtendi, turǵyndardy aıap kettim. Órshigen órtti óshirý muratynda muhıttaǵy sýdy sebetke quıyp, tası bastadym. Sol sebepti de keshigip qaldym.

Qazy kúlip jiberedi.

– Ot shyqsa o týraly biler ek qoı, solaı ma? Budan buryn, sebetpen sý tasydy degendi senen estýim. Baıqaýymsha, aqyldan aljasqan sekildisiń qoıanym, sandyraqtap turǵanyń – mynaý!

Sonda ol búı deıdi:

– Munym sandyraq bolsa, onda búgingi talqyǵa túsken másele – ekibastan essizdik. Qudaıshylyǵyn aıtyńyzshy, o zaman da, bu zaman, ilgerili-keıindi buqanyń buzaýlaǵanyn kim kórgen, myrzam?

Qazy:

– Sen danagóı qoıan ekensiń, – dep onyń tapqyrlyǵyna tánti bop, isti qyzdyń paıdasyna sheship kep jiberedi.

             Foto ashyq derekkózden alyndy

Aýdarǵan: Qazaqstan Jazýshylar odaǵynyń

múshesi, jazýshy-dramatýrg,

ádebıettanýshy, synshy Álibek BAIBOL.

 

Ertegi aýdarmashynyń ruqsatymen jarııalandy.

Avtorlyq quqyq saqtalǵandyqtan kóshirip basýǵa bolmaıdy!

Pikirler