Keshe Shymkent qalasyndaǵy №125 mekteptiń birqatar muǵalimi mektep basshylyǵynyń aqsha jınaıtynyna shaǵymdandy. Bilim basqarmasy shaǵym boıynsha komıssııa quryp, qazir tekserip jatyr. Bul týraly Shymkent qalasy ákiminiń orynbasary Shyńǵys MUQAN óziniń Facebook paraqshasynda jazdy dep habarlaıdy «Adyrna» ulttyq portaly.
«Aldyn ala málimet boıynsha, osydan úsh jyl buryn mektep ashylǵan kezde mektep ujymy aqsha jınap, mektepke perde satyp alǵan eken. Odan basqa da shaǵymdaryn teksertip jatyrmyz. Aıyptylar jazalanady. Nátıjesi shyqqan soń, qosymsha habarlaımyn.
Mundaı jaǵdaıdyń bolǵany jaqsy emes, árıne. Biraq bul jaǵdaıdyń ishte qalmaı, syrtqa shyqqany jaqsy boldy. Mektep dırektorlarynyń shalys basqan kez kelgen qadamy jaǵdaıdy túzeýge berilgen múmkindik. Jaman da bolsa úırenetin jaqsy keıs.
Mektepterde ata-analar men muǵalimderden aqsha jınalmaıdy. Ákimdik bilim salasyn tolyq qarjylandyryp otyr. Bıyldan bastap Shymkenttiń mektepteri jan basyna qarjylandyrý modeline ótti. Mektep basshylyǵy qarjyny durys josparlaýǵa tıis jáne zań sheńberinde jumys isteýge tıis.
Óz basym, «kórseń – aıt» degen qaǵıdanyń jaqtaýshysymyn. «Aýrýyn jasyrǵan óledi» demekshi, eger mektepterde aqsha jınaý sekildi zańsyz áreketterdi kórseńiz, jasyrmańyz, aıtyńyz» dep jazdy Shyńǵys Muqan.
