Q net-ke kúıgender...

5247
Adyrna.kz Telegram

 

Dál búgin Taldyqorǵan qalasynyń qaq ortasyna Q net týrıstik kompanııasyna kúıgen, kúıregen,  aldanǵan adamdardyń legi  jınalǵan eken. Olar atalmysh kompanııaǵa qaryzdanyp, qaýqalanyp jatyp, nesıe alyp, bala-shaǵanyń aýzynan jyryp berip, 850 000 teńgesin quıyp kirgen kórinedi. Ortalyqqa jınalǵan aldanǵan adamdardyń aıtýynsha, 10 ese, tipten 100 ese etip qaıtaryp berýdiń ornyna qarajattarynyń shetin de kórsetpegen.

Q net-ke otbasymen kirip, 4 mıllıonyn túgel quıǵan áıel

 

Q net-tegiler aldymen kompanııaǵa múshelikke ótkizý úshin birneshe ret qymbat degen meıramhanalarǵa aparyp, túrli dámdi taǵamdardy aldyna tosyp, «gıpnozdap», tipten nesıe de alyp beremiz dep sharasyz kúıge túsiredi eken. Odan keıin kompanııaǵa tirkegen ár adam úshin aptanyń seısenbi kúninde 180 000 teńge quıylyp turatynyn tilge tıek etip, Qvi ataýyndaǵy kartochkasyn da beredi. Kartochkanyń qudirettiligi sol–álemniń eń úzdik degen 44 memleketine baryp, teginnen tegin demalýǵa bolady-mys. Osylaısha «Aldyńa as qoıdym, eki qolyńdy bos qoıdym» degendeı, ańqaý halyqty quryqqa túsiredi.

Qazirgi tańda qanatyn keńge sozyp, erkin qulash sermegen kompanııa –Qazaqstannyń túkpir-túkpirinde keńselerin ashyp alǵan. Taldyqorǵan qalalyq polıııa bólimshesine Q net-ke kúıgen 200-ge tarta adam aryz qaldyrsa, Almaty qalasynda da aryzdanýshylar sany kúnnen kúnge artyp keledi. Olardyń keıbireýi 5-6 mıllıonǵa deıin "qoraǵa" kirgen.

«Al ózderin «starshyılaryńmyn» dep sendirgen Dınara men Qýanysh esimdi alaıaqtar 36 mıllıonǵa avtokólik, kvartıra alyp baıyp alǵan»,– deıdi aldanǵan áleýmet. Iá, "pálen jerde altyn bar, barsań baqyr da joq" degen osy eken...

 

 

Aqgúl AIDARBEKOVA,

«Adyrna» ulttyq portaly

Pikirler