Almaty jýrnalısteri qaladaǵy jańadan ashylǵan Jýrnalıster alleıasyna talshyn aǵashynyń kóshetin otyrǵyzdy. Demalys kúnine sáıkes kelgen sharaǵa 35 basylymnan 50-den astam jýrnalıst qatysyp, 200-ge jýyq kóshet otyrǵyzyldy.
Alleıa Abaı dańǵylynyń boıynda, Gagarın dańǵylynan Jarokov kóshesine deıin sozylyp jatyr.
«Biz talshyn aǵashyn tańdadyq, óıtkeni ol shaharmen baılanysty alǵashqy Almaty aǵashy. Ekinshi sebep: jer astyndaǵy barlyq jerde baılanys bar: ınjenerlik jeliler, sý, elektr, telefon jelileri jáne t.b. Bul aýmaq erekshe jaǵdaı emes, al kashtannyń tamyry óte qysqa bar bolǵany úsh metr. Jalpy, qala ekologtarynyń, gorzelenstroı mamandarynyń usynystaryn eskere otyryp, sektorlarǵa aýdandastyrylǵan», - dep túsindirdi, Almaty qalasy ákimdiginiń jasyl ekonomıka Basqarmasynyń bastyǵy Natalıa Lıvınskaıa.
Jýrnalısterdiń aıtýynsha, mundaı ıgilikti shara qala ekologııasynyń jaqsarýyna septin tıgizedi, ári áriptestikti nyǵaıtady.
Maqpal Noǵaıbaeva, «Jas qazaq» gazetiniń tilshisi:
– Sharaǵa ózińiz de birge qatystyńyz, ári birligimiz jarasyp qolymyzǵa bir-bir kúrek alyp aǵash kóshetin otyrǵyzdyq. Muny óte ıgi sharanyń biri dep esepteımin. «Atadan mal qalǵansha, tal qalsyn» degen sóz bar dana halqymyzda. Sondyqtan aǵash egýdi ata-babamyzdan kele jatqan bir dástúr desek te bolady, ári Almaty qalasynyń ekologııasyna qajet nárse dep oılaımyn.
Bir jaǵynan súıikti qalamyzdyń órkendeýine, kórkeıýine kishene de bolsa da ózimizdiń úlesimizdi qostyq dep oılaımyn. Ózińiz de baıqap otyrǵandaı keıbir áriptesterimiz bala-shaǵalaryn ertip kelip, olarǵa úlgi kórsetip jatyr. Jalpy biz búgin talshyn aǵashyn ektik. Talshyn óte shydamdy, tózimdi aǵash. Basqa aǵashtardan ádemi japyraqtarymen erekshelenedi. Endi Abaı kóshesimen jýrnalıster alleıasynan ótip bara jatqanda «biz osynda aǵash ekkenbiz» dep balalarymyzǵa aıtyp, ónege kórsetip júretin bolaıyq. Qalamyzǵa, otanymyzǵa degen súıispenshilik osyndaı ıgi isterden bastaý alady. Sondyqtan bolar, ózim erekshe qýanyshty kúıde turmyn.
Gúlvıra Bıǵalıeva, «Eýrazııa» telearnasynyń redaktory:
–Negizi men alma aǵashyn ekkim kelgen. Ákimdikke, Jasyl ekonomıka departamentine aport aǵashyn eksek, aportty jandandyrsaq jáne «Qazaq jýrnalısteriniń alleıasy» degen úlken alleıa ashsaq dep usynys tastaǵanym ras. Alaıda biz búgin talshyn (kashtan) degen aǵash ektik. Onyń qandaı bolyp ósetinin bilmeımin. Jýrnalıster (orys-qazaq – avt.) alleıasy ashyldy. Degenmen biz qazaq jýrnalıster alleıasyn bólek jasatqymyz kelip tur.
Endi Abaı kóshesiniń boıynda, qalanyń qaq ortasynda jýrnalısterdiń óz taldary bar. Iaǵnı, oǵan kelip kútim jasaýyna, óz talynyń qasynda óleń-jyryn oqýyna múmkindikteri bar. Kóshetti otbasymyzdyń amandyǵy úshin nıettenip otyrǵyzyp jatqan jaıymyz bar. Aǵashtardyń gúldenip óskeni ekken adamnyń ómirine áser etedi dep oılaımyn. Sondyqtan árbir saýapty is jasaǵan kezde erekshe kóńil-kúımen jasaý kerek. Óz basym baqsha óimderin, gúl ekkendi óte jaqsy kóremin. Sol arqyly ómirdiń ádemiligin túsinýge bolady.
Bul aǵashtar qandaı jaǵdaıda da adam ómirin jaqsartýǵa sep bolady. Sondyqtan da saýapty isimiz densaýlyqqa da, kóńil-kúıdiń kóterilýine de paıdasyn tıgizedi.
«Elge mal kóptik qylmaıdy, Jerge tal kóptik qylmaıdy» – demekshi Almaty jýrnalısteri «bir jaǵadan bas, bir jeńnen qol shyǵaryp» aıta júrerlik is atqtardy. Endi bul bastamany ózge óńirlerdegi áriptesterimiz ilip áketse degen tilegemiz bar.
Gúlvıra Asqarqyzy,
«Adyrna» ulttyq portaly
