Ótken aptada Ózbekstan Respýblıkasynyń prezıdenti Shavkat Mırzııoevtiń Syrdarııa aýdanynda jańadan salynǵan úılerdiń jaǵdaıymen tanysqandyǵy týraly aqparat tarady. Mamyr aıyndaǵy apattan baspanasynan aırylǵan ózbek jurty aldaǵy ýaqytta sonda qonys aýdarmaq. Al maqtaaraldyqtardyń jaǵdaıy qandaı?
Halyq TJ rejıminde terezeden telmirip, úreı ústinde otyrǵanda, 1 mamyr kúni Ózbekstannyń Sardoba sý qoımasy jarylýy jyǵylǵanǵa jqdyryq bolǵandaı edi. Saldarynan Maqtaaral aýdanynyń birneshe aýyly zardap shekkeni eldiń áli de esinde. Apattyń beti qaıta bastaǵannan-aq eki memleket te úılerinen aırylǵan azamattarǵa qoldaý bildirgen-di. Buhara halyq ta judyryqtaı birigip, asaryn aıamaǵan. Qoly ashyq meenattar da aıanyp qalmady. 5 aıdan astam ýaqyt ishinde qurylys nysandary aıaqtalyp, qınalǵan jurt baspanaly bola bastady.
Review.uz ózbekstandyq saıtynyń málimetinshe, 13 qazan kúni Shavkat Mırzııoev Syrdarııadaǵy Sardoba sý qoımasyndaǵy apattan keıin salynǵan jańa turǵyn aýdandy aralaǵan. Bul turǵyn aýdanǵa arnaıy «Iangı Ýzbekıston» (Jańa Ózbekstan – Red.) degen ataý berilgen. Ózbekstan prezıdenti bul jaıynda halqyna: «Iangı Ýzbekıston» ataýy bekerden-beker berilmedi. Eger bul úıler halyqqa unasa, biz dál osyndaı úılerdi basqa, halqy tyǵyz ornalasqan aımaqtarǵa da salamyz. Ár massıvtiń janynda biz jumys oryndaryn quramyz. Jalpy, bizge qurylys pen ómir súrý mádenıetin ózgertý qajet», - dep túsindirgen.
Derekkózderge súıensek, eki myńnan astam úı turýǵa jaramsyz bolyp, taǵy eki myńdaıy jóndeýden ótýi tıis bolǵan. Shavkat Mırzııoev jaǵdaımen tanys bolǵan soń, aımaqty tek qalpyna keltirip qana qoımaı, gúldendirýge de ýáde bergen kórinedi. Bul úshin tańdalǵan 50 gektar úsh massıvte 86 bes qabatty úı salynǵan: 37 – Sardoba aýdanynyń "Dýstlık" mahallasynda, 40 – Hakıkat mahallasynda jáne 9-Mırzaabad aýdanynyń "Navbahor" mahallasynda úıler boı kótergen. Barlyǵy 2 640 páter úısiz qalǵandarǵa tabystalǵan. Sonymen qatar bul jańa massıv aýmaǵynda kitaphana, dúkender men balalar oınaıtyn alańdar da salynǵan.
Al Qazaqstandaǵy jaǵdaıǵa toqtalsaq, qyrgúıek aıynda Túrkistan oblysynyń ákiminiń orynbasary Meıirjan Myrzalıev: «Jalpy aýdanda salynyp jatqan 895 úıdiń 195-si Órgebas, 314-i Fırdaýsı aýyldarynda, 386-sy Myrzakent kentinde boı kóterýde. Búginde Órgebasta 44, Fırdaýsı eldimekeninde 88, Myrzakent kentinde 227 turǵyn úı qurylysy aıaqtalyp otyr. Jospar boıynsha barlyq úıler qazan aıynyń sońyna deıin tolyǵymen salynyp bitýi kerek. Oblys ákimi Ómirzaq Estaıulynyń tikeleı qadaǵalaýynda turǵan bul jumystar búginde qarqyndy túrde júrgizilýde», – dep málimdegen.
19 qazan kúni sol 895 úıdiń 386-synyń kilti halyqqa tabystalǵan. 70 gektar jerde ornalasqan bul jańa qalashyqqa Jeńis, Jańaturmys jáne Dostyq eldi mekenderiniń turǵyndaryn qonystandyrý kózdelgen. Aıta keteıik, 386 úıdiń ishinde 196 turǵyn úıdi úkimet rezervinen bólengen qarajatqa, 150 úıdi Bolat Ótemuratov qorynyń qarjysyna salǵan. Al 40 baspanaǵa «Nur Otan» partııasynyń «Biz birgemiz» qory men «Salıqaly urpaq» demeý kórsetken.
Osyndaı qýanyshty habardyń artynsha baspanasy áli kúnge daıyn emes keıbir azamattar áleýmettik jeliler arqyly berilgen úılerdiń tolyq aıaqtalmaǵandyǵyn jetkizýde.
Belgili bloger, jýrnalıst Dáýlet Tóleýtaıulynyń Instagram paraqshasynda (beıne jazba siltemede – Red.) maqtaaraldyqtardyń áli kúnge úıleriniń bitpegendigine narazylyqtaryn bildirgen vıdeosy jarııalandy. Beınejazbany túsirgen azamat: «9-úı. 19 oktıabr 2020 jyl. Mine, bizge berilgen úı. Bitti degen úı... Ahýaly, mine, eshnárse bitpegen. Búgin biz myna úıge kirý kerek bolatynbyz. Bizdi osy jerge kirgizbekshi», - deıdi ashynyp (beınejazbadaǵy sózder ózgerissiz berildi).
Apat saldarynan baspanasynan – bir, qolyna ustaǵan kúreginen – eki aırylǵan halyq jaǵdaılarynyń áli de ońala qoımaǵandyǵy úshin alańdaıdy. Qys aýasynda qalaı kún kórip, tirshilik etemiz dep te ýaıymdaıdy. Al bólingen qarajatqa sáıkes áli kúnge halyqtyń jaǵdaıynyń jaqsartylmaǵany búgin aıqyn kórinip tur.
Foto ashyqderekkózden alyndy
Aıjan PERDEBEKQYZY
«Adyrna» ulttyq portaly
