Bügın Şymkent qalasynyŋ äkımı Mūrat Äitenov äuesqoilar arasynda şaǧyn futboldan ötken Qazaqstan chempionatynda jeŋıske jetken «Standart» futbol komandasynyŋ müşelerın qabyldady.
Şahar basşysy futbolşylardy el chempiony atanuymen qūttyqtap, olarǧa būqaralyq sportty damytuǧa üles qosqany üşın alǧys aitty.
—Äuesqoilar arasyndaǧy futbol — būqaralyq sporttyŋ meilınşe keŋ taralǧan, tanymal türı. Sondyqtan Sızderdıŋ jeŋısterıŋız barşa şymkenttıkter üşın eleulı oqiǧa dep bılemın. Sport – densaulyq kepılı. Jas ūrpaqtyŋ denı sau bolsa, ūltymyz ärqaşan bäsekege qabılettı bolmaq. Sol sebeptı bügınde memleket būqaralyq sporttyŋ damuyna, jastardyŋ salauatty ömır saltyn ūstanuyna barynşa jaǧdai jasap otyr, — degen Mūrat Düisenbekūly biyl Şymkentte 27 Street-workout alaŋy salynǧanyn atap öttı.
Mūrat Äitenov qazır qala tūrǧyndarynyŋ 28 prosentı sport jäne dene şynyqtyrumen tūraqty türde ainalysatynyn, osy körsetkıştı Prezident tapsyrmasynda aitylǧandai, 30 prosentke jetkızu maqsatynda auqymdy jūmys atqarylyp jatqanyna toqtaldy.
Qala äkımı komandanyŋ jeŋıske jetuıne bapkerler Sabyrjan Bekpaev pen Husan Utametovtıŋ de zor üles qosqanyn aityp, olarǧa sättılık tıledı.
Sonymen qatar «Standart» komandasynyŋ aldaǧy uaqytta Ukrainada ötetın şaǧyn futboldan äuesqoilar arasyndaǧy älem chempionatynda el namysyn laiyqty qorǧaitynyna senım bıldırdı.
Kezdesudıŋ soŋynda äkım bapkerler men futbolşylarǧa Alǧys hat pen arnaiy syilyqtar tabys ettı.
Şymkent qalasy äkımınıŋ baspasöz qyzmetı
