Şymkent qalalyq №1 klinikalyq auruhanasynda ekı nauqasqa büirek transplantasiiasy jasaldy. Därıgerler qos ananyŋ büiregın nauqas balalaryna hirurgiialyq jolmen salyp berdı.
Beibıt Sidazimov 2 jyldan berı büirek jetıspeuşılıgı dertımen esepte tūrady. Nauqas būǧan deiın tösekke taŋylyp, gemodializ apparatyna qosylǧan. Büiregınde aqauy bar 33 jastaǧy azamatqa tuǧan anasy donor boldy. Därıgerler 1965 jylǧy azamatşanyŋ bır büiregın hirurgiialyq jolmen alyp, tuǧan ūlyna sättı qondyrǧan.
Sonymen qatar, ūzaq jyldardan berı aurudyŋ azabyn tartqan Tüimebai Asylbekke anasy Bijanova Aqqyz bır büiregın berdı. Tuystyq transplantalogiiany därıgerler 10 qyrküiek künı jasaǧan. Ekı saǧatqa sozylǧan büirek auystyru otasy sättı aiaqtaldy.
Aita keteiık, Şymkent qalalyq klinikalyq auruhanasynda transplantasiialyq qyzmet qarqyndy damyp keledı. Mūnda 2013 jyldan berı 160 büirek pen 21 bauyr almastyru operasiiasy jasaldy.
Auruhana materialdyq-tehnikalyq tūrǧydan tolyq jabdyqtalǧan. Mūnda aǧzadaǧy organdardy auystyru jaǧynan täjıribesı mol mamandar jūmys ısteidı. Auruhanadaǧy gemadializ ortalyǧynda büirek almastyru otasyn qajet etetın 400-ge juyq nauqas esepte tūr. Donor tabylǧan jaǧdaida bılıktı mamandar nauqastarǧa transplantasiia jasauǧa daiyn.
Şymkent qalasy äkımınıŋ baspasöz qyzmetı
