Shymkent qalasyndaǵy jer, sáýlet jáne qala qurylysy basqarmasy arqyly 19 túrli memlekettik qyzmet kórsetiledi. Búginde onyń barlyǵy da elektrondy túrde júrgizilip otyr.
Máselen, basqarmanyń «nalyk-saulet» júıesi iske qosylǵan bolatyn. Ol arqyly jyljymaıtyn múlikke nómer berý, ony naqtylaý jáne joıý qyzmetteri tolyqtaı avtomattandyryldy.
Buǵan deıin bul qyzmetti turǵyndar 6 jumys kúni ishinde alyp kelgen. Qazir elektrondy baǵdarlamanyń arqasynda jarty saǵat kóleminde alý múmkindigi týyp otyr. Bıyl 8 aıda «nalyk-saulet» júıesi arqyly azamattarǵa 7 500 memlekettik qyzmet kórsetilipti.
Sonymen qatar, halyqtyń tarapynan eń úlken suranysqa ıe sáýlet-josparlaý tapsyrmasyn berý qyzmeti (APZ) avtomattandyryldy. Byltyr osy qyzmetti alý úshin 17 jumys kúni qajet bolsa, qazir 3 jumys kúni ishinde alýǵa múmkindik bar.
Aıta keteıik, APZ-ny alý kezindegi talap etiletin tabıǵı monopolııa sýbektileriniń tehnıkalyq sharttaryn ótken jyly 15-20 kúnde alatyn. Avtomattandyrylǵannan keıin bul qyzmet túrin de 2 jumys kúni ishinde alýǵa bolady.
Shymkent qalasy ákiminiń baspasóz qyzmeti
