Almatyda alaıaqtyq jasady dep aıyptalǵan adam ekonomıkalyq tergeý departamentiniń terezesinen sekirip ketti. Bul týraly Qazaqstannyń qarjy monıtorıngi komıtetiniń baspasóz qyzmeti málim etti, dep habarlaıdy Stan.kz aqparat agenttigi.
Oqıǵa 22 qyrkúıekte bolǵan. Iri kólemdegi alaıaqtyq jasady dep aıyptalǵan Erlan Qonyspaev tutqyndaý kezinde ekonomıkalyq tergeý basqarmasynyń besinshi qabatynyń terezesinen sekirip ketti. 44 jastaǵy er adam qaıǵyly qazaǵa ushyrady.
"Dereý jedel járdem brıgadasy shaqyryldy, olar Qonyspaevtyń qaıtys bolǵany týraly málimdedi. Qazirgi ýaqytta bul fakti boıynsha sotqa deıingi tergeý bastaldy. Sonymen birge, Qazaqstan Respýblıkasy qarjy mınıstrliginiń qarjy monıtorıngi komıtetimen ishki qyzmettik tergeý júrgizilip jatyr. Sonymen qatar, qylmystyq tergeýge qatysýshylardyń qaýipsizdigin qamtamasyz etý boıynsha vedomstvolyq sharalar qabyldanýda. Qarjy monıtorıngi komıteti marqumnyń otbasyna qaıǵylaryna ortaqtasyp kóńil aıtady jáne osy qaıǵyly jaǵdaıdy obektıvti tergeýge barlyq kómek kórsetedi", - dep habarlady baspasóz qyzmeti.
Qylmystyq is materıaldary boıynsha, marqum 2016 jyly QR BǴM Ǵylym komıtetinen 230 mıllıon teńge kóleminde maqsatty grant alǵan. Komıtet Qonyspaevtyń enshiles kompanııalardyń esepshottaryna 88 mıllıon teńgeden astam aqsha aýdarǵanyn jáne kelisimshartta qarastyrylǵan jumys aıaqtalmaǵanyn aıtady.
"22 qyrkúıekte marqumnyń advokatynyń qatysýymen kúdikti retinde jaýap alyndy. Onyń áreketteri Qylmystyq kodekstiń 190-baby 4-bóligi - Iri kólemdegi alaıaqtyq boıynsha kvalıfıkaııalanǵan. Tergeý áreketteri aıaqtalǵannan keıin, Qonyspaevtyń 2012 jyly aýyr qylmys jasaǵany úshin sottalǵandyǵy eskerilip, jańa aýyr qylmys jasaǵany úshin tergeýshi ony QIJK-niń 128-babyna sáıkes qamaýǵa alý jáne ýaqytsha tergeý ızolıatoryna ornalastyrý týraly sheshim qabyldady. Osy sátti paıdalanyp, ustaý jáne jeke tintý hattamalaryn jasaǵannan keıin Qonyspaev terezeden sekirip ketti", - dep habarlady komıtettiń baspasóz qyzmeti.
