Áskerı yntymaqtastyq týraly kelisimsharttyń jobasy prezıdent Qasym-Jomart Toqaevtyń qaraýyna jiberildi
"Qazaqstan Respýblıkasy men Reseı Federaııasy arasyndaǵy áskerı yntymaqtastyq jónindegi kelisimshartqa qol qoıý týraly" jarlyq jobasy "Ashyq NQA" platformasynda jarııalandy.
Ol 1994 jyldyń 28 naýryzyndaǵy Qazaqstan Respýblıkasy men Reseı Federaııasy arasyndaǵy kelisimsharttyń ornyna ázirlendi, sondyqtan qorǵanys mınıstrlikterine qatysty máseleler boıynsha elderdiń ózara yqpaldastyǵyn damytyp, jandandyrýy tıis.
Jarlyq jobasy Qazaqstan Respýblıkasy men Reseı Federaııasy arasyndaǵy 1992 jyldyń 25 mamyryndaǵy Dostyq, yntymaqtastyq jáne ózara kómek týraly kelisimsharttyń jáne 2013 jyldyń 11 qarashasyndaǵy Qazaqstan Respýblıkasy men Reseı Federaııasy arasyndaǵy HHI ǵasyrdaǵy tatý kórshilik pen odaqtastyq týraly kelisimsharttyń erejelerine negizdelgen.
Onyń negizgi qaǵıdattary – odaqtastyq jáne strategııalyq seriktestik, memlekettik egemendik pen aýmaqtyq tutastyqty ózara qurmetteý, shekaralardyń myzǵymastyǵy, daýlardy beıbit jolmen sheshý jáne kúsh qoldanbaý, teń quqyqtyq pen ishki isterge aralaspaý qaǵıdattary, delingen jarlyqtyń kirispe bóliminde.
Jańa áskerı kelisimshart neni retteıdi?
Qazaqstan men Reseı kelesi máseleler boıynsha ózara árekettesý týraly kelisimge keldi:
- taraptardyń biri júgingen jaǵdaıda, taraptardyń qaýipsizdigin qamtamasyz etý úshin áskerlerdi (kúshterdi) paıdalanýdy birlesip josparlaý;
- taraptardyń biri júgingen jaǵdaıda, aımaqtyq qaýipsizdikke tónetin syn-qaterlerge birlese qarsy turý;
- jedel jáne jaýyngerlik daıyndyq;
- áskerı bilim jáne ǵylym;
- terrorızmge qarsy is-qımyl;
- bitimgershilik qyzmet;
- taraptardyń óz aýmaǵyndaǵy áskerı quramalarynyń qyzmetin qamtamasyz etý, áskerlerdiń (kúshterdiń) qyzmeti jáne olardy jan-jaqty qoldaý;
- ekijaqty quqyqtyq kelisimshart bazasyn jetildirý;
- taraptardyń áskerı delegaııalarynyń halyqaralyq uıymdardyń jumysyna qatysýy aıasyndaǵy ózara is-qımyly;
- memlekettik qupııany saqtaý;
- mádenıet jáne sport.
Osy kelisimshart aıasynda Qazaqstan men Reseı áskerı saladaǵy strategııalyq seriktestiktiń úsh jyldyq kezeńge arnalǵan baǵdarlamasyn ázirleıdi.
Taraptarǵa qandaı mindet júkteledi?
Kelisimshartta taraptardyń áskerı barlaý salasyndaǵy yntymaqtastyǵy kórsetilgen, biraq taraptardyń árqaısysy qarsy tarapqa baǵyttalatyn barlaý qyzmetin júzege asyrmaýǵa mindetteledi. Taraptardyń formasy men mazmunyna qaramastan, osy kelisimshart sheńberinde bir-birine bergen kez kelgen aqparaty basqa tarapqa zııan keltirý maqsatynda paıdalanylmaýy qajet.
Bul kelisimsharttyń basqa memleketterge qarsy baǵyttalmaǵandyǵy jáne taraptardyń basqa halyqaralyq kelisimsharttardan týyndaıtyn quqyqtary men mindetterine áser etpeıtindigi atalyp ótken.
Sputniknews.kz
