Bizdiń aýyldan ınternetti ıtpen izdep taba almaısyz. Qaladaǵy qudańyzben sóıleskińiz kelse, qyr izdep, aqyrynda osyraq qońyz terip ketesiz... Et jep bolyp, esinep, dalaǵa shyqsam, bizdiń úıdiń tóbesinen bireýlerdiń shyńǵyryp sóıleskenin estip, esimnen tanyp qala jazdadym. Iegimdi saýsaǵymmen kóterip, aspanǵa qarasam, shatyrymda qonaqtap otyrǵan kórshimizdiń Almatyda ýnıversıtette jáne mektepte oqıtyn úsh balasyn kórip, tirideı ólip, sabyrymdy, aqylymdy qara jerge kómip, aıqaı saldym.
–Áı, qarǵalardaı qarqyldap, neǵyp otyrsyńdar?–dep suradym tań qalyp, tańdaıym jabysyp, tańdanyp..
–Jerde ınternet ustamaı jatyr, sosyn sizdiń úıdiń shatyryna shyǵyp.... –dedi stýdent.
–Nemene, bizdiń úıdiń shatyry ınternet ortalyǵy ma? Túsińder!
–Kóketaı, onlaın sabaq ótip jatyrmyn. Almatymen.
–Meniń shatyrym Almaty ma saǵan? Shıpyrdy syndyrasyńdar, túsińder deımin!
–Biz mektepke barmaımyz, onlaın sabaq ótýdemiz, –dedi kórshimniń keńkeles balasy aýyz–basyn qısaıtyp. Keńkeles bolmasa, bireýdiń shatyryna shyǵyp, onlaın bola ma? Aýyl aımaqty ınternetpen qamtamasyz etpegen mınıstrlikterinen kórsin!
–Túsińder, áıtpese, balamnyń rogatkisimen atamyn!
–Osy úıdegi apaı ruqsat berdi ǵoı?
–Qatynym ba? Bul úıge men qojaıynmyn! Óz shatyrlaryńa shyǵyńdar!
–Sizdiń shatyryńyz bıik eken.
Taspen atqylap edim, qoryqqan stýdenttiń aıaǵy taıyp ketip, syrǵanap baryp, úıdiń janyna baılaýly turǵan aıǵyrymnyń ústine qonjııa ketti. Aıǵyrym qoryqqanynan úrkip, esek sııaqty aqyryp ketti me, esegim kisinegendeı, ıtim kúlgendeı body ma, áıteýir aınala azan– qazan boldy. Bárin qýyp shyǵyp, úıge kirdim de, áıelimniń basyna tostaqpen toq etkizdim.
–Nemenege kól–pál bola qaldyń?
–Tegin shyǵardym ba? Shatyr ústine shyǵyp, onlaın sabaq ótkenderi úshin mınýtyna elý teńgege kelistim. Bıznes qoı, –dep áıelim jylap aldy, murnyn byrq etkizip súrtý úshin bet oramalymdy surap aldy. Bir kezde úıdiń tóbesinde tórt adam tóbelesip jatqandaı bolyp ketti de, aýlaǵa atyp shyqtym. Iegimdi saýsaǵymmen kóterip, shatyrǵa qaradym da, shalqamnan tústim. Mássaǵan! Shatyrym tóbesinde tanymaıtyn bir semiz áıel men shıdeı erkek qushaqtasyp otyr.
–Sender kimsińder? –dep suradym men.
–Ózińiz kimsiz?–dedi áıel uıaly telefonyn qulaǵyna tosa berip.
–Kak kimmin? Osy úıdiń qojaıynymyn!
–Keshirińiz, –dedi erkek erine sóılep, –baǵana áıelińizge myń teńge berip qoıǵanbyz. Biz arǵy kóshede turatyn Arǵynbaıdyń qudalary edik.
–Qudalary bolsańyz qaıteıin?
–Astanadaǵy qudamyzben onlaın qudalyq ótkizip otyrmyz. Jerde set selt etpeıdi eken.
Bir kezde semiz áıel syrǵanaı ketti. Zárem qalmady, Ary júgirdim, beri júgirdim, jerge qulap ólse, jaýap beremin ǵoı? Abyroı bolǵanda úı janyndaǵy shóptiń ústine qulady da, qutqarýǵa umtylamyn dep, onyń ústine men quladym.
–Ústimde neǵyp jatyrsyz?–dep surady ol.
–Onlaın mahabbat, –dedim men keketip. Quryp ketsin mundaı onlaın degenderi! Shatyrym shytynap, ne istesem eken dep tisimdi shuqylap, basymdy sıpalap, júıkemdi qıqalap otyrmyn, oý aǵaıyn onlaıyn sabaqtarda sán bar ma, osylaı oqyǵandarynda mán bar ma, balalaryńyzdyń qaýashaǵynda dán bar ma, ózi? Pandemııa partany saǵyndyrdy ǵoı balalarymyzǵa!
Muhtar Sherimniń qyshqyl satırasy,
«Adyrna» ulttyq portaly
