Shymkent qalasynyń 3549 turǵyny «Bastaý Bıznes» baǵdarlamasy boıynsha kásipkerlik negizderin meńgerý boıynsha oqytýdan ótti. Onyń 2820-na oqýdy aıaqtaǵany týraly sertıfıkat berilse, 729-na qatysqany týraly sertıfıkat tabystaldy.
Kásipkerlik negizderin meńgergen túlekter oqý aıaqtalǵan soń test tapsyrady. Úsh múmkindik beriledi. Emtıhannan ótpese, tek oqýǵa qatysqany jóninde ǵana sertıfıkat alady. Eger testiden jaqsy nátıje kórsetse, oqýdy bitirgeni jaıly sertıfıkat alyp, grantqa úmitker bolady. Grant qaıtarymsyz, biraq monıtorıngtik top arnaıy tekserý jumystaryn júrgizip otyrady. Iaǵnı bul – áleýmettik kómek emes, kásibin bastaýshy kisilerge bıznes josparyn iske asyrýyna jasalyp jatqan múmkindik.
Arnaıy qurylǵan komıssııanyń qorytyndysynan keıin jobasy maquldanǵan baǵdarlamaǵa qatysýshylar memleket tarapynan beriletin 200 AEK kólemindegi grantty alatyn bolady.
Bıyl karantındik sharalardy eskere otyryp, bul jobaǵa tirkelý men oqý qashyqtyqtan (onlaın) «Atameken Academy» platformasy arqyly ótýde. Jobaǵa qatysýshylar eń aldymen halyqty jumyspen qamtý ortalyǵynan joldama alýy tıis. Ary qaraı «Atameken» Kásipkerler palatasyna kelmeı-aq, oqýǵa onlaın tirkele alady. Ol úshin jeke basyn kýálandyratyn qujatty jáne halyqty jumyspen qamtý ortalyǵy bergen joldamany https://atameken.co/kk/course-bastau siltemesine júkteıdi. Oqý merzimi – 21 kún. Dáristerdi kásibı daıyndalǵan bıznes jattyqtyrýshylar oqıdy.
Shymkent qalasy ákiminiń baspasóz qyzmeti
