Mahabbat– Afrıkada da mahabbat! Jasym jıyrma toǵyzǵa kelse de, keńkeles emespin, ker jalqaý emespin, kúshenshek emespin, kúlegesh emespin, biraq, mahabbattan jolymnyń bolmaı júrgeni, meniń kús–kús alaqanyma aqqýdyń qonbaı júrgeni ras. Mal baǵyp, ony satýmen aınalysamyn.
Bir kúni Eshkigúl degen qyzben ınternet arqyly tanysyp, ózimdi Qoıbaǵar dep tanystyryp, aqyrynda ol maǵan «Mahabbat» ýnıversıtetiniń test suraqtaryn jiberdi. Soǵan basym qatyp otyr, dosym testten qulap qalasyń dep, ár nárseni shatyp otyr. Sizderden suranatynym, test suraqtarynyń durys jaýaptaryn jazyp jiberińizdershi, aqysyna alty myń teńgeni Kaspıı golf pa, gold pa, gord pa, soǵan jiberemin.
Birinshi test suraǵy: –Mahabbat degenimiz ne? A.)Adamnyń júregi. B) Qoıdyń júregi.Á) Ittiń júregi. Ekinshi testiń suraǵy: –Haýa ana men Adam ata qashan úılengen? A) Bizdiń eramyzǵa deıin B) Byltyr. Á) Ajyrasyp ketken. Úshinshi testiń suraǵy: –Qazirgi qyzdar halal ma? A) Aram. Qandaryna temeki, araq, gashısh, shetel erkekteriniń uryǵy aralasyp ketken. B) Qý. «Súıem!» dep úılenip alady, sosyn, úıin, baılyǵyn tartyp alyp, ajyrasýdy úırenip alady. Á) 90 paıyzy halal. Tórtinshi testiń suraǵy: –Jigitter qyzdardy nege aldaıdy? A) Aldar Kóseniń inileri. B) Taýyq mahabbat. Á) Aldamaıtyndar da bar, olar– aýrý.
Besinshi testiń suraǵy: –Qyz Jibektiń alǵashqy mahabbaty. A) Bekejan. B) Tólegen. Á) Túrkistan oblysynyń burynǵy ákimi. Altynshy testiń suraǵy: – Qyz ben jigittiń alǵashqy dıalogy: –A) Nesıeńiz bar ma? B) Davaı, súıiseıik? Á) Sizben tanysqanyma alpys jyldan keıin ókinbeıtin shyǵarmyn dep oılaımyn. Jetinshi testiń suraǵy: –Shyńǵyshannyń qansha qatyny bolǵan? A) Men qaıdan bileıin? B) Júz elýdeı. Á) Ol kezde kalkýlıator bolmaǵan. Segizinshi testiń suraǵy: –Áıel men erkek nege birge jatady? A) Qarańǵyda qoryqpas úshin.B)Urysyp jatý úshin. Á) Urpaq qamy, Otan úshin. Toǵyzynshy testiń suraǵy: –Mahabbat jasqa qaraıdy ma? A) Mahabbatta kózildirik joq, qaramaıdy. B) Maıshammen qaraıdy. Á) Kelinshekter inilerindeı jigitterge tıip jatyr. Onynshy testiń suraǵy: – Jigit pen qyz qydyryp kele jatqanda, aldarynan aryq kezdesti. Jigit ne isteıdi? A) Qyzyn ıterip jiberedi.B) Aryqqa kóldeneń jata ketip, kópir bolady.Á) Qyzdy arqalap, keri qasha jóneledi.
Mine, osy on suraqtyń jaýabyn súıiktim «Mahabbat» ýnıversıtetinen alyp, vaappen jiberipti. Basym qatyp otyr, dosym «topas bolsań, qatynsyz qalasyń!» dep ala kózimen atyp otyr. Kómektesińizdershi?
Muhtar Sherimniń qyshqyl satırasy,
«Adyrna» ulttyq portaly
