Parlament depýtaty Bekbolat Tileýhannyń qarǵysyna oraı belgili dintanýshy Qaırat Joldybaıuly pikirin bildirdi.
"Menen keıbir kisiler qarǵys aıtýdyń dindegi úkimin surap jatyr. Musylman balasyna keshirimdi bolyp, ózine jamanshylyq jasaǵan, renjitken adamdar úshin Alladan jaqsylyq tilegen jarasady. Bul eń áýeli kisiniń júregin kekten, yza men dushpandyqtan saqtaıdy. Seni renjitken adamǵa degen júregińdegi dushpandyqty basqa emes, sol adamǵa arnaıy jasaǵan izgi tilegiń ǵana jýyp tazalaıdy. Kókirekke kek baılatpaıdy. Men muny óz basym jıi qoldanamyn. Ekinshiden shynaıy janashyrlyq. Abaıdyń “Adamdy súı, Allanyń hıkmetin sez” degen pálsapasy bizdi osyǵan tárbıeleıdi. Ýaǵyzdy ne úshin aıtamyz? Adamdardy eki dúnıede de jamanshylyqqa ushyramasa eken degen janashyrlyqpen aıtamyz. Endeshe qarǵys, osy nıetimizge keraǵar áreket.
Biraq ómirde neshe túrli jaǵdaı bolady. Túrli zulymdyqqa ushyraǵan kisiniń qatty jany qysylǵanda aýyzynan erikti-eriksiz qarǵys sóz shyǵýy da múmkin. Biraq ony bylaıǵy ýaqytta renjisken ár adamǵa qoldaný durys emes. Ary ketse, Allaǵa tapsyrǵan abzal. Keıde ary men namysyn saqtap qalýdyń basqa joly qalmaǵanda, naqaqtan jala japqan adamǵa baryp “seniń aıtqanyń ras bolsa, Qudaı meni tóbemnen ursyn, al jalǵan bolsa seni ursyn” dep birge duǵa eteıik dep usynys jasaýǵa ruqsat. Muny dinde “mulaǵana” deıdi. Kóp jaǵdaıda ózine senimsiz tarap budan bas tartyp jatady. Bul biraq asa zárý jaǵdaıda ǵana jasalady. Qarǵys jaıly qysqasha málimetten keıin áleýmettik jelide qyzý talqylanyp jatqan Bekeńniń aýdıosy jaıly qysqasha ǵana aıtaıyn.
Bekeńniń júıkesi syr bergenge uqsaıdy. Shyn janym ashydy.
Alla barshamyzdyń bilip-bilmeı istegen kúná, qatelikterimizdi keshirsin!
Ýa, Allam, bizge adamdardyń jaqsy jaǵyn kóre biletin kóz, nashar jaǵyn keshire alatyn júrek, jamandyqty umyta alatyn kókirek, eshqashandaı jaǵdaıda úmit pen senimin joǵalpaıtyn rýh bere gór!", - dep jazba qaldyrdy dintanýshy.
"Adyrna" ulttyq portaly
