Karantın kezinde muǵalimder úıinde emes, mektepke baryp júr. Elimizdegi barlyq aımaqtyń muǵalimderi qazir mektepke baryp, túrli sharýalaryn atqarýǵa kiristi. Biri osyǵan deıin jasalǵan remonttan keıingi synyp bólmesin tazalasa, endi biri óz qarajatyna synyp bólmesine remont jasap júr. Bul qalaı?
«Atyńnan aınalaıyn ÚKIM ET degen....Seniń arqańda synybymdy halyqtyń balasy úshin óz qarajatyma ózim jóndep aldym.
Qyzyq!? Osy synyptardyń jóndeý jumystaryna qansha qarajat bóldi eken?
Ol qaı jerde qaldy eken? Ol qarajatty sanaǵan adam arzymaǵan aqsha úshin shet elge kete qoımas...» dep jazdy Túrkistan oblysynyń muǵalimi Sveta ALPAMYSOVA óziniń áleýmettik jeli paraqshasynda.
Bul jazbany oqı otyryp, birneshe suraqtyń qulaǵy qyltıdy. Birinshiden, nege karantın kezinde muǵalim mektepte júr? Ekinshiden, karantınde mektepke barǵan muǵalimge synyp bólmesin remonttaý ne sebepti júktelgen? Úshinshiden, nege remont jumysy maýsym, shilde aılarynda jasalyp, bitpegen? Tamyz aıy ár muǵalimniń jańa oqý jylyna daıyndalýǵa tıis ýaqyty emes pe? Al eń basty suraq, ne sebepti muǵalim óz qarjysyna synyp bólmesin remonttap júr?
Sveta apaıǵa habarlasyp, mán jaıdy suramaq nıetimiz oryndalmady. Bálkim, remont jumysy men eshqashan bitpeıtin mekteptiń qaǵazbasty sharýasynan murshasy bolmaǵan shyǵar.
Desek te, eń soraqysy, osy jazbanyń astyndaǵy keıbir pikirlerdiń jaǵa ustatqany boldy.
«Óz qarajatyma demeńiz, aılyǵyńyzǵa aı saıyn nadbavka bar ǵoı synypty ustaǵanyńyz úshin» depti Alhımık Alhımık degen bireý. Árıne, bul feık. Biraq sol feıktiń artynda qazirgi shirip bitken júıeni qoldaıtyn bir pendeniń otyrǵany anyq qoı. Demek, jalaqyǵa qosylatyn ár tıyndy osylaı eseptep, osyndaı pikir bildiretinder qoǵamda áli de jetkilikti. Sonymen qatar dál osy pikirdi Sveta apaıdyń jazbasyna arnaıy joldanǵan, jaldamaly adamnyń jazǵany da sózsiz.
Synyp úshin beriletin bes myń teńgeniń aınalasyndaǵy aqsha muǵalimge ár oqýshy úshin jaýapkershilik júkteıtin aqsha. Sabaq ýaqytyndaǵy balamyzdyń amandyǵyn muǵalimge tapsyramyz. Mine, sol úshin memleket ustazdyń jalaqysyna bes myńnyń aınalasyndaǵy teńgeni qosady.
Eger joǵarydaǵy qısyq pikirdi muǵalim jazyp otyrsa, onda aramyzda sonshalyqty saýatsyz, sonshalyqty bilimsiz adamdardyń da ardaqty «ustaz» degen atty arqalap júrgeni ǵoı, demek? Mine, osyndaı pikirdegi pendelerdiń kesirinen basqalary zardap shegýde.
Bilim jáne ǵylym mınıstri Ashat AIMAǴAMBETOV ustazdardyń zańdy quqyǵynyń taptalýyna jol bermeı, myna másele boıynsha tıisti shara qoldanady dep senemiz.
Merýert HÝSAINOVA,
"Adyrna" ulttyq portaly.
