Bilim jáne ǵylym mınıstri Ashat Aımaǵambetov jańa oqý jylynda birinshi toqsanda qashyqtan oqytý týraly sheshim qabyldaýyna baılanysty ata-analar men oqýshylarǵa, sondaı-aq muǵalimderge úndeý jasady.
"-Qymbatty ata-analar! Tórtinshi toqsan kezinde túsinistik tanytqandaryńyz úshin alǵys aıtqym keledi. Balalar men muǵalimderge, ata-analarǵa óte qıyn boldy. Biraq sizder jaǵdaıǵa túsinistikpen qaradyńyzdar.
Sizderdiń osyndaı sheshimge túsinistikpen qaraǵandaryńyzdy qalaımyn. Bul kezeń aıaqtalatynyna jáne bizdiń balalar mektepke oralatynyna senimdimin. Qazir biz bilim berý sapasyn qamtamasyz etý úshin barlyq sharany qoldanamyz.
"Oqýshylar mektepti, dostary men muǵalimderin saǵyndy. Shydamdylyq qajet! Biz koronavırýsty jeńemiz, sizder mindetti túrde mektepke barasyzdar, biraq qazir jaqsylap demalyp, oqý jylynyń basyna daıyndalý kerek," -dedi mınıstr OKQ-daǵy onlaın-brıfıngte.
Aıta keteıik, bıylǵy oqý jylynyń birinshi toqsany shalǵaıda ornalasqan shaǵyn jınaqty aýyldy mektepterdi qospaǵanda, elimizdiń barlyq mektepterinde 1-11 synyptarda qashyqtan oqytý formatynda bastalady.
-Bastaýysh synyp oqýshylarynyń ata-analarynyń ótinishi boıynsha, ahýal jaqsarǵan jaǵdaıda, qatań sanıtarlyq sharalardy saqtaı otyryp, kezekshi synyptardyń jumys isteýine múmkindik beriledi.
-Aldaǵy ýaqytta halyqtyń aýyrý deńgeıi turaqty tómendeýine baılanysty, mektepterdi aqyryndap aralas oqytý jáne shtattyq formatta oqytýǵa kóshirý júrgiziledi.
-JOO-ry men kolledjderde oqytý qashyqtan oqytý rejıminde uıymdastyrylady.
Dástúrli format:
-jeke keste boıynsha zerthanalyq jumystar, óndiristik oqytý jáne kásibı praktıka úshin bolady;
-shalǵaıda ornalasqan kolledjderde az kontıngentimen sanıtarlyq rejımdi nyǵaıta otyryp ótkiziledi.
