Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly otandastarymyzǵa úndeý joldady.
"Halqymyzda "Aýyr jol - atańdy synaıdy, aýyr is - adamdy synaıdy" degen sóz bar. Halqymyzdyń basyna kelip otryǵan jaǵdaı bárimizge ońaı tıip jatqan joq. Alla Taǵala dertke shaldyqqandarǵa shıpa berip, dám tuzy taýsylǵan jandardy meıirimine alǵaı", - dep sózin bastady.
Qazir kóptegen adamdardyń qurban shalyp jatqanyna toqtalyp, munyń náýbetten aman-esen ótkizýine sebepker bolýyn tiledi.
"Qurmetti qaýym, asyl dinimizde qajet ýaqytta qajet kómekti jasaý úlken saýapty amaldardyń birine jatady. Syndarly sátte naýqas jandarǵa qajetti dári-dármekti jetkizip, alǵys alaıyq. Dári-dármektiń baǵasyn qoldan qymbattatýǵa jol bermeı, jaqsylyq jasaýǵa asyǵaıyq. Al jurtymyzdy juqpaly indetten arashalap alýǵa bar kúshin jumsap, jan-tánimen qyzmet etip júrgen aq halatty abzal jandarǵa jyly sózimizdi arnap, jigerin oıataıyq. Olar úshin árdaıym duǵada bolaıyq", - dedi Naýryzbaı qajy.
"Adyrna" ulttyq portaly
