Sh.Aımanov atyndaǵy «Qazaqfılm» kınostýdııasynyń prezıdenti, Qazaqstannyń eńbek sińirgen qaıratkeri Arman Ásenov qazaq kınosynyń kórnekti qaıratkerlerin eske alýǵa arnalǵan memorıaldy jańartý úshin jeke ınvestıııa tartty. Bul týraly ol óziniń Facebook-tegi jeke paraqshasynda málimdedi.
Esterińizge salsaq, kınostýdııanyń kire berisinde ornalasqan memorıaldy keshen qazaq kınosynyń negizin qalaýshy Sháken Aımanovtyń eskertkishi, UOS jyldarynda Birikken Ortalyq kınostýdııada jumys istegen qyzmetkerlerdiń esimderi jazylǵan memorıaldy taqta jáne 30-ǵa jýyq kınogerlerdiń esimi jazylǵan juldyzdar alleıasynan turady.
- Ótkensiz bolashaq joq ekenin men qashan da aıtyp júremin. Sondyqtan da osy qyzmetke kelgeli beri qazaq kıno óneriniń damýyna ólsheýsiz úles qosqan kınogerlerdiń esimderin jańǵyrtýǵa, olardyń eńbegin dáripteýge erekshe kóńil bólemin. Biraz jyl buryn qurylǵan bul keshen ýaqyt ótken saıyn ábden eskirgen. Sháken Kenjetaıuly eskertkishi tuǵyrynyń betkeıleri men juldyzdar alleıasyna qaraǵan saıyn janym aýyrady, – dedi kınostýdııa prezıdenti Arman Ásenov
Osylaısha kınostýdııa basshysy memorıaldy keshenge qatysty oıymen belgili bıznesmen dosymen bóliskende, ol bul másele boıynsha kómektesýge daıyn ekendigin bildirgen. Búgingi tańda jańa keshenniń jobasy daıyn, ony jaqyn arada kópshilikke usynady.
- Memorıaldyq keshendi jańartý barysynda Uly Jeńistiń 75 jyldyǵyna oraı maıdanger-kınogerlerge de qurmet kórsetetinimizdi jetkizgim keledi. Búginde uıymdastyrý toby olardyń tizimin jasaýǵa kirisip te ketti. Oǵan qosa qazaq kınosynyń tarıhynda óshpes iz qaldyrǵan, qurmetke laıyq kóptegen qaıratkerlerdiń esimderin umytpaýymyz qajet, – dedi Arman Ásenov
Kınostýdııa basshysynyń aıtýyna qaraǵanda jaqyn arada Juldyzdar alleıasy Káýken Kenjetaev, Pavel Zalman, Quman Tastanbekov, Mıhaıl jáne Fedor Aranyshev, Jambyl Qudaıbergenov, Iýrıı Pomeranev, Nurmuhan Jantórın, Mıhaıl Kolbasovskıılerdiń esimderimen tolyǵady...
Sondaı-aq, «Qazaqfılm» prezıdenti barlyq qazaqstandyqtardy memorıaldyq keshendi jańǵyrtý ıdeıasyn talqylaýǵa shaqyrdy. Juldyzdar alleıasyna qatysty usynystardy (qazaq kınosy maıtalmandarynyń esimderin tolyqtyrý boıynsha) kense@kazakhfilmstudios.kz poshtasyna jiberýińizge bolady.
"Adyrna" ulttyq portaly
