Dulat Aǧadıldıŋ qazasynan soŋ qozǧalǧan qylmystyq ıste onyŋ otbasynyŋ müddesın mūnan bylai advokat Ǧalym Nūrpeiısov qorǧaidy. Ol tergeu barysyna bailanysty qūpiiany jariialamau jönınde mındetteme alǧandyqtan äzırge ıs barysy turaly aitpaitynyn, ıs aiaqtalǧan soŋ saraptamasyn jariialaityn aitty. Ol qylmystyq ıstı tergeu 25 mamyrdy aiaqtaluy mümkın dep boljaidy.
Ǧalym Nūrpeiısovtıŋ Azattyqqa aituynşa, zaŋda qylmystyq qūqyq būzuşylyq jasady degen küdık boiynşa ūstalǧan adamdy küzetpen ūstau - onyŋ ömiri men densaulyǧyna qater töndırmei jüzege asyryluǧa tiis ekendıgı anyq jazylǧan.
- Dulat Aǧadıldı üiınen tırı äketıp, ızınşe mäiıtın qaitarǧany - qūqyq qorǧau organdarynyŋ qylmystyq atqaru prosesıne kem degende nemqūraily qaraǧanyn körsetedı, - deidı Ǧalym Nūrpeiısov.
Advokat Qazaqstan prezidentı Qasym-Jomart Toqaevtyŋ belsendınıŋ qazasyna jaily pıkırıne de közqarasyn bıldırdı. Ol prezident tergeu aiaqtalmastan būryn belsendını "jürek talmasynan qaitys boldy dep senımmen aita alamyn" deu arqyly ıs baǧytyna sılteme jasaǧandai boldy" dep sanaidy.
"Dulat Aǧadıl ısı" boiynşa sotqa deiıngı tergeu basynda onyŋ anasynyŋ müddesın advokat Aiman Omarova qorǧap, keiınnen bas tartqan. Aiman Omarova bas tartu sebebın "Dulat Aǧadıl otbasynyŋ özge advokattary bar jäne otbasynyŋ özı naqty aqparat taratpai otyr" dep tüsındırgen.
Alaida Dulat Aǧadıldıŋ anasy Gülbaraş Jolmūhanbetova Aiman Omarvaǧa deiın advokattary bolmaǧanyn aitady.
44 jastaǧy belsendı Dulat Aǧadıl biyl, 2020 jyly 25 aqpanda Nūr - Sūltandaǧy tergeu izoliatorynda qaitys bolǧan. Ony 24 aqpanda tünde qarapaiym kiımdegı bırneşe adam üiınen äketken. IIM onyŋ "jürek talmasynan" qaitys bolǧanyn mälımdegen. 27 aqpanda äleumettık jelıde Dulat Aǧadıl mäiıtınıŋ videosy taraǧan. Videony tüsırgen adam onyŋ denesınde kögergen ızder baryn aitady. Keiınırek jergılıktı prokuratura "video internetke belsendınıŋ tuystarynyŋ rūqsatynsyz jariialandy, denedegı daqtar biologiialyq ölım belgılerı" dep mälımdegen.
Dulat Aǧadıldıŋ qazasynan keiın Qazaqstannyŋ bırneşe qalasynda ötken narazylyq aksiialaryna qatysuşylar belsendınıŋ qazasyna bilık kınälı dep esepteitının bıldırgen.
28 aqpanda Qazaqstan prezidentı Qasym-Jomart Toqaev belsendı Dulat Aǧadıl "jürek talmasynan qaitys boldy" dep mälımdegen. Resmi saraptama qorytyndysy şyqpai tūryp aitylǧan būl tūjyrymdy qoǧam ökılderı synaǧan.
Dulat Aǧadıldıŋ polisiia äketken soŋ jūmbaq qazaǧa ūşyrauyna bailanysty AQŞ memlekettık departamentınıŋ ökılı, Ūlybritaniianyŋ Qazaqstandaǧy elşılıgı men Europadaǧy qauıpsızdık pen yntymaqtastyq ūiymy Nūr-Sūltandy tergeudı aşyq ärı ädıl jürgızuge şaqyrǧan.
Qazaqstandyq qūqyq qorǧauşylar men belsendıler Dulat Aǧadıldıŋ qazasyn "saiasi sipaty bar" dep sanap, tergeudı ädıl jürgızudı talap etıp keledı.
"Azattyq" radiosy
