QR Prezıdenti Qasym-Jomart Toqaev koronavırýspen kúreske qansha aqsha bólingenin aıtty, dep habarlaıdy zakon.kz.
Qazaqstan pandemııanyń ekpinin azaıtý úshin qandaı sharalar qabyldap jatqandyǵy týraly Prezıdent TASS bas dırektorynyń birinshi orynbasary Mıhaıl Gýsmanǵa bergen eksklıýzıvti suhbatynda aıtty.
Prezıdenttiń aıtýynsha, bul baǵyttaǵy sharalarǵa memleket 5 jarym, tipti shamamen 6 trln teńge jumsaǵan.
Jalpy, biz qabyldaǵan sharalarǵa memleket bes jarym, tipti shamamen 6 trıllıon teńge shyǵyndady - bul 13 mıllıard dollar nemese jalpy ishki ónimniń 8 paıyzdan astam kólemi. Iaǵnı, taǵy qaıtalap aıtamyn, bul buryn-sońdy bolmaǵan, shuǵyl áreket etýdi qajet etken sharalar. Bul sharalardy maqsatty túrde qolǵa aldyq, árıne, erteń syn-eskertpeler bolýy múmkin, máselen aqshany jelge shashty degendeı. Biraq men, eń aldymen, bul jaǵdaıda bizdiń azamattarymyzdyń ómiri men ál-aýqaty úshin aıanbaı kúresýimiz kerek dep sanaımyn, - dedi ol.
Sonymen qatar, Toqaev halyq joqta ekonomıkanyń da bolmaıtynyn basa atap ótti.
