"Aq jol" demokratııalyq partııasy QR Syrtqy ister mınıstrliginiń Qytaıǵa joldaǵan notasyna baılanysty óz ustanymyn bildirip, ondaǵy BAQ-tardyń arandatýyna óz narazylyqtaryn bildirdi.
QKP OK Halyqaralyq bóliminiń meńgerýshisi
Sýn Tao myrzaǵa
Qytaı Halyq Respýblıkasynyń
Qazaqstan Respýblıkasyndaǵy tótenshe
jáne ókiletti elshisi
Chjan Sıao myrzaǵa
Qurmetti Sýn Tao myrza!
Qurmetti Chjan Sıao myrza!
Qazaqstannyń «Aq jol» Demokratııalyq partııasy jýyrda Qytaı BAQ-da jarııalanǵan arandatý maqalalarǵa baılanysty narazylyq bildiredi jáne Qazaqstan Respýblıkasy Syrtqy ister mınıstrliginiń osyǵan baılanysty notasyna qosylady.
Ashyq aqparat kózderine súıensek, kórshi elde Qazaqstan Respýblıkasynyń terrıtorııasy men táýelsizdigine kóz alartatyn jarııalanymdar kóbeıip barady. Osy jyldyń 28 naýryzynda Qytaıdyń tanymal WeChat áleýmettik jelisinde «Qazaqstan Qytaıǵa qashan oralady?» degen maqala; 8 sáýirde osy eldiń eń iri www.sohu.com ınternet-platformasynyń saıtynda «Nelikten Qazaqstan Qytaıǵa oralýǵa umtylady?» degen maqala jarııalanǵan.
Biz mundaı aqylǵa syımaıtyn sózderdi qorlaý dep qabyldaımyz. «Aq jol» Demokratııalyq partııasy men elimizdiń mıllıondaǵan azamattary úshin Qazaqstan Respýblıkasynyń Táýelsizdigi men ulttyq memlekettiliginen qymbat qundylyq joq.
Osy basylymdardaǵy kerjaq pikirler qos halyqtyń arasyndaǵy tatý kórshilik pen senimge orasan zııanyn tıgizedi dep esepteımiz.
Eki eldiń memleketteri men saıası partııalarynyń mindeti, kerisinshe, bir-birimizdiń ulttyq múddelerimizdi eskere otyryp, teń dıalog pen yntymaqtastyqty damytý dep sanaımyz.
Sondaı-aq sizden osy basylymdar týraly bizdiń pikirimizdi Qytaı Kompartııasy Ortalyq Komıtetiniń Halyqaralyq bóliminiń basshylyǵyna jetkizýdi suraımyn.
Azat Perýashev,
Partııa tóraǵasy
"Adyrna" ulttyq portaly
