Aqmola oblysynyń ákimi oblys halqyna úndeý jasady, - dep habarlaıdy "Adyrna" ulttyq portalynyń tilshisi. Ermek Myrjyqpaev úndeýinde oblys halqyn tynyshtyq saqtaýǵa shaqyrdy.
Qurmetti aqmolalyqtar!
Ózderińiz bilesizder, keshe 7 sáýir kúni oblysymyzdyń aýmaǵynda kúshti daýyl boldy. Sekýndyna otyz metrge deıin jetetin qatty jeldiń áserinen oblys ortalyǵynda jáne oblystyń birqatar aýdandarynda elektrmen qamtamasyz etý úzildi. Turǵyn úılerdiń, áleýmettik obektilerdiń shatyrlary zaqymdandy.
Shamamen 30 adam túrli aýyrtpalyq dárejesinde jaraqat aldy. Ókinishke oraı, Býrabaı aýdanynda bir adam qaıtys boldy. Qaıtys bolǵan adamnyń týystary men jaqyndaryna qaıǵylaryńyzǵa ortaqtasyp kóńil aıtamyn.
Qazir barlyq kommýnaldyq kúshter men TJ qyzmetteri óńirdegi tabıǵı stıhııa saldaryn joıýǵa jumyldyryldy.
Qurmetti jerlester! Barlyqtaryńyzdy tynyshtyq saqtaýǵa shaqyramyn.
Zalaldyń shyǵyny eseptelýde. Barlyq obektiler qalpyna keltiriletin bolady. Zardap shekkenderge qajetti kómek kórsetiledi.
Oryn alǵan jaǵdaıda tynyshtyq saqtaý qajet, úreıge berilýge bolmaıdy jáne azamattyq jaýapkershilik tanytý kerek. Osylaısha biz birlesip barlyq qıyndyqtardy ótkere alamyz.
"Adyrna" ulttyq portaly
