Italııanyń kınematografısteri koronavırýs pandemııasyna baılanysty "10 kún ótken soń" atty rolık túsirdi, - dep habarlaıdy The Atlantic.

Rolık avtory Olmo Parentıdiń aıtýynsha, ıtalııalyq BAQ-tar jańa vırýstyń taralǵany jaıly habarlaı bastaǵan kezde jergilikti halyqtyń kóbi oǵan asa mán bergen joq. Kóbi tipti COVID-19 jaıly jańalyqtardy estip, úreılengenderge qarap kúlip júrdi deıdi.

Parentıdiń aıtýynsha, birneshe kúnnen soń oǵan Italııada aqyrzaman bolǵan sııaqty kóringen. On myńnan asa adam vırýs juqtyryp, myńdaǵan adam qaıtys bolǵan. Tótenshe jaǵdaı jarııalanyp, úıden shyǵýǵa tyıym salynǵan.

"Bastapqyda kóbi bul jaǵdaıdyń ýshyǵatynyn bilgen joq, ony mańyzdy dep sanamady, vırýstyń jappaı taralýyna da osy sebep bolǵan shyǵar. Biz jańalyqtardan basqa elderdiń bizdiń qatemizdi qaıtalap jatqanyn estip jatyrmyz. AQSh pen Ulybrıtanııada 10 kúnnen soń Italııadaǵy jaǵdaı bolady dep jatyr. Sondyqtan biz ıtalııalyqtardan 10 kún burynǵy jaǵdaıdy surap, keńester suradyq", - deıdi rejısser.

"Betperde satyp alýdy surap jatqan anańa kúlme, bar da betperde satyp al", - deıdi vıdeoda.

"Biz jaǵdaıdy túsinbedik, baǵalamadyq, qatemizdi qaıtalamańyzdar, úıde otyryńyzdar", - delingen rolıkte.

Eske salaıyq, munyń aldynda Italııada bir táýlikte koronavırýstan 350-ge jýyq adamnyń qaıtys bolǵany habarlanǵan bolatyn. Elde dertten ólim qushqandardyń sany 2 myńnan asyp ketti.

Derek kózi Tengrı nıýs.kz