Memleket basshysy áleýmettik shıelenis pen jumyssyzdyqqa jol bermeý úshin barlyq qajetti shara qabyldanatynyn atap ótti.
Qazaqstannyń halyqaralyq rezervteri 90 mıllıard dollarǵa jetti. Bul týraly Qazaqstan prezıdenti Qasym-Jomart Toqaev málimdedi.
"Biz koronavırýstyń jahandyq ekonomıkaǵa asa qatty áser etip turǵanyna kýámiz. Shyn máninde, álemniń barlyq ekonomıkalyq júıesin qaıta formattaý týraly sóz bolyp otyr. Qazaqstan osy úlken daǵdarystyń áserin bastan keship jatyr. Alaıda osy ekonomıkalyq kataklızmderge qaramastan, biz áleýmettik shıelenis pen jumyssyzdyqqa jol bermeý úshin barlyq qajetti sharany qabyldaımyz", - dedi Toqaev.
Prezıdenttiń aıtýynsha, Qazaqstannyń halyqaralyq rezervteri shamamen 90 mıllıard dollarǵa jetti. Bul qarajat – ekonomıkalyq turaqtylyqtyń negizi. Sonyń esebinen memleket óziniń áleýmettik mindetterin atqaratyn bolady.
"Biz bıýdjet qarjysyn jumyspen qamtý men bıznesti damytý jaǵynan naqty nátıje beretin baǵyttarǵa jumsaıtyn bolamyz. Otandyq kásipkerlerdi qoldaý men jańa jumys oryndaryn qurýǵa kem degende 300 mıllıard teńge bólinedi. Bıznesti kredıtteý deńgeıin tómendetýge bolmaıdy. Sondyqtan ishki naryqty toltyryp, óndiristi yntalandyrý úshin "Qarapaıym zattar ekonomıkasy" baǵdarlamasyn qarjylandyrý kólemi artady", - dep atap kórsetti Toqaev.
Memleket basshysy qazirgi jaǵdaıda baǵany alyp-satarlyq ádispen kóterýge jol berilmeıtinin jetkizdi. Osy oraıda prezıdent barlyq ákimge baǵa máselesin qatań baqylaýda ustaýdy tapsyrdy.
Sputnik.
