Qazaq tarıhynda tuńǵysh ret Almaty qalasynda dástúrli óner teatry ashyldy. Bul óner ordasynyń Táýelsizdiktiń 25 jyldyǵy men Almaty qalasynyń 1000 jyldyǵy aıasynda shymyldyǵy túrilip otyr. Ataýly óner oshaǵy halqymyzdyń kóziniń qarashyǵyndaı saqtap kele jatqan ulttyq muralarymyzdy jańǵyrtýdy basty murat etedi.
Almaty qalasyna Baýyrjan Baıbek myrza ákim bolyp kelgennen bastap qazaq rýhanııatynyń damýyna erekshe jaǵdaı jasap jatyr. Osy isteriniń eń basynda – «Alataý» dástúrli óner teatrynyń ashylýy tur. Óner oshaǵynyń ashylý saltanatynda sóz sóılegen qala ákimi: «Qazaq mádenıeti qaıratkerleriniń birneshe býyny ásem qalamyzda ómir súrip, ózderiniń ólmes týyndylaryn dúnıege ákeldi. Mine, osyndaı mádenıet pen ónerdiń kıeli ortalyǵy, dástúrli shyǵarmashylyqtyń qasıetti shańyraǵy, ońasha otaýy bolýy tıis edi. «Alataý» dástúrli óner teatryn ısi qazaq úshin asa mańyzdy án, jyr-terme, kúı, aıtys jáne ulttyq kıno sııaqty aıtýly bes baǵytta qyzmet etetin, osy sala maıtalmandarynyń basyn quraıtyn shańyraq bolady dep úmittemin» – dedi.
«Sazgen sazy» ansambliniń kúıimen bastalǵan koertti halyq erekshe yqylaspen tyńdady. Ramazan Stamǵazıev, Nurjan Janpeıisov, Sáýle Janpeıisova, Aıgúl Qosanova, Uljan Baıbosynova, Janqoja Aıapovtar tárizdi ónerpazdar án-jyrdan shashý shashty. Aıtysker aqyndar Muhtar Nııazov pen Aspanbek Shuǵataevtar tamasha aıtys jasady. Nurgúl Amantaıqyzy jetekshilik etetin «Arnaý» folklorlyq ansambliniń jas ónerpazdary da jurt kóńilinen shyqty.
Uljan Baıbosynova, jyrshy:
- Dástúrli ánshi-jyrshylar úshin úlken qýanysh, zor maqtanysh. Bul teatr ánshilik, jyrshylyq, kúıshilik muralarymyzdyń damýyna mol úlesin qosady. Mundaı teatrdy kóptegen jyl boıy armandap keldik. Endi, mine, sol tilegimiz oryndaldy.
Teatrǵa jınalǵan jurtshylyq Qazaq mýzykalyq aspaptar mýzeıi men «Sherter» ulttyq saz aspaptar kompanııasynyń usynǵan qolóner kórmesin tamashalady. Kórmege daýylpaz, adyrna, sazsyrnaı, qobyz sekildi qazaqtyń barlyq ulttyq aspaptary qoıylǵan eken.
Jasulan NAÝRYZÁLI
