Ǵasyrǵa jýyq ýaqyt sezimtal óner túrin eń talǵampaz kórermen nazaryna usynyp kele jatqan Almaty qalasyndaǵy Memlekettik qýyrshaq teatry úshin bıyl mereıli jyl. Memlekettik qýyrshaq teatryna 85 jyl! Jańa maýsym shymyldyǵy túrilgeli jańashyl dúnıelermen kórermenin qýantyp kele jatqan ujym eresekterge arnalǵan spektaklder de sahnalap, sońǵy ýaqyta qýyrshaq teatry óneriniń kókjıegin keńeıtti. Mereıli maýsymda jaryqqa shyqqan «Men bir jumbaq adammyn... Abaı» (rej.: A.Zaıev) qoıylymy da buryn-sońdy qazaq qýyrshaq teatry arqalamaǵan júkti kóterdi. Aqyn ómiri men ónerine munshalyqty joǵary deńgeıde baǵa berilmegendigin teatrtanýshylar men teatr maıtalmandary erekshe atap ótken bolatyn.
Ónerdi órkendetý jolynda úzdiksiz eńbek etip kele jatqan kıeli qara shańyraqtyń búgingi shyǵarmashylyq tynysy, aldaǵy is-sharalar josparlaryn qoǵamǵa keńinen nasıhattaý maqsatynda aǵymdaǵy jyldyń naýryz aıynyń 1-shi juldyzynda BAQ ókilderine arnap BASPASÓZ TÝRYN ótkizdi. Respýblıkamyzdaǵy tuńǵysh qýyrshaq teatry kóktemniń alǵashqy kúni ALǴYS AITÝ merekesine oraı aqparat salasynyń jýrnalısteri, belsendi blogerler men portal, radıo tilshileriniń basyn qosty. Teatrdyń árbir aıtýly is-sharalary men halyqaralyq festıvalderdegi eleýli eńbekterine aqparattyq qoldaý kórsetip, kórermenderimizge keńinen nasıhattap júrgen áriptesterimizge alǵys aıta otyryp, jeksenbilik mádenı demalys uıymdastyryldy.
Teatrdyń 85 jyldyq mereıtoıymen tuspa-tus ótkeli otyrǵan «Qýyrshaqtar shaqyrady – 2020» Halyqaralyq qýyrshaq teatrlarynyń festıvali aldynda BAQ ókilderine óner ordasynyń ózine ǵana tán óndirisi men ishki shyǵarmashylyq úderisi keńinen tanystyryldy. Atap aıtqanda, balalar úshin qýyrshaq jasaý sheberleri master-klasstar, tigiń ehynyń sheberleri men ardager aktrısalar muraǵattaǵy qýyrshaqtarmen tanystyrý sharalaryn ótkizdi. Sonymen birge, teatrdyń tólqujatyna aınalǵan otyz bes jyldan astam tarıhy bar «Qýyrshaq dýman» (rej.: S.Shúkirov, Q.Eshmuratova) qoıylymynyń da tegin kórsetilimi uıymdastyrylyp, balalyq shaq pen balǵyn kezeńge saıahat jasaldy.
Is-sharadan soń teatrǵa arnaıy at basyn burǵan «Adyrna» ulttyq-etnografııalyq birlestigi dırektory Arman Áýbákir: «Búgin qýyrshaq teatryna kelip, boıymdy erekshe eki qýanysh bılep tur. Biri, qazaq tilindegi qoıylymdardyń balalar úshin de, ata-analar úshin de tıimdi ýaqytqa qoıylǵandyǵy. Buǵan deıin qazaqsha qoıylymdar yńǵaısyz tańǵy ýaqytta bolatyn. Ekinshiden, eresekterge arnalǵan spektaklder sahnalap, qazaq mádenıetin álemdik arenaǵa tanytyp júrgen ujymnyń jemisti eńbegi kóp ekenine kóz jetkizdik. Qazaq tilindegi qoıylymdar sany artyp bala kórermenderdiń qyzyǵýshylyǵy oıanýyna sebep bolǵan búgingi is-sharanyń mańyzy zor ekenin aıtqym keledi. Birlesken jumys qashan da óz nátıjesin beredi. Aldaǵy bastamalaryńyzǵa sáttilik serik bolsyn!» dep pikir bildirse, jýrnalıst Madına Sarbalaeva: «Qazaq jýrnalısterin qonaq etken Memlekettik qýyrshaq teatry qýyrshaqtardyń jasalý jolyn, olardyń obrazdarymen jaqyn tanysýǵa múmkindik syılady. Mádenı oshaqpen tereń tanysýǵa sebepker bolǵan barsha teatr qyzmetkerleri men artısterine alǵysymdy bildiremin» degen aqjarma tilekterin ortaǵa saldy.
«31 Arna» telearnasynan kelgen jýrnalıst Jaras Nııazbek: «Bıyl qurylǵanyna 85 jyl tolyp otyrǵan irgeli ujymǵa tórt botamdy ertip baryp, umytylmastaı ásermen qaıttyq. Repertýar qazaqylanyp, ujym úzdiksiz, demalyssyz jumys jasaıtyndyǵyn kórdik. Keremet kún úshin rahmetten ózge aıtar sóz joq. Endi turaqty kórermender qatarynan tabylamyz jáne barshańyzdy ǵajaıyptar mekenine búldirshinderińizdi ákelip turyńyzdar dep keńes beremiz. Ókinbeısizder!» dep aıaqtady.
Alpysqa jýyq aqparat salasynyń belsendi jýrnalısteriniń basyn qosqan aıtýly shara tek teatr tynysymen tanystyrý emes, kópshilikke beımálim qýyrshaq ónerin keńinen dáripteıtin áriptesterimizge alǵys aıtý maqsatynda uıymdastyryldy.
Memlekettik qýyrshaq teatry uıymdasyratyn is-sharalar legi munymen tolastamaq emes. Merekeli kúnderge toly aıda qýyrshaq teatry usynar qýanyshty sátter kóp bolmaq. Teatr jańalyqtarynan qapy qalmańyzdar!
Beıbit ÁLKEEVA
"Adyrna" ulttyq portaly
