Qurmetti qazaq halqy!
Kóktemniń birinshi kúni men úshin óte mańyzdy kún! Erteń Alǵys Aıtý Kúni! Osyǵan oraı, qazaq halqyna koreı halqynyń atynan shyn júrekten aıtar alǵysym sheksiz.
Bizdiń ata-babalarymyz 1937 jyly deportaııaǵa ushyrap, Qazaq jerine eriksiz kelip túskende, qazaqtar olarmen sońǵy nanymen bólisip, ajaldan qutqaryp, kómek bergeni úshin koreı halqynan alǵys bildiremin. Sol kezde qazaq halqy ata-babalarymyzǵa qol ushyn bermegende, men de bul dúnıege kelmes edim jáne osy alǵysymdy dál qazir jazyp otyrmas edim. Qazaq jeri koreıler úshin kıeli ári qasıetti jer bolyp tabylady. Men Ózbekstanda týǵanmyn. Meniń Otanym, týǵan jerim -Ózbekstan. Men Qazaqstanǵa ata-anamnyń shaqyrýymen kelip, qazaq tilin bilýge degen qyzyǵýshylyǵym artyp, bar yntammen oqyp úırene bastadym. Maǵan tek qana til emes, jalpy qazaq halqynyń ózi, salt-dástúri unaı bastady, maqaldaryn túsine bastadym. Sodan ózime: "Nege men qazaq tilin damytý úshin osynsha janymdy berip jumys jasap jatyrmyn?"- dep suraq qoıdym. Sol suraǵyma ózim jaýap tapqan sııaqtymyn. Meniń oıymsha, Alla taǵala meni Qazaqstanǵa ata-babalarymnyń atynan alǵys aıtý úshin jibergen sııaqty. Sol qıyn kezde meniń ata-babama kómek bergen qazaq halqyna degen qurmetimdi árqashanda alǵa qoıamyn.
Qazaq halqynyń eń jaqsy qasıetteriniń biri bul osy jerde turyp jatqan árbir halyqty qurmetteı biledi. Mysaly, bizder,koreı halqy týraly únemi “eńbekkor “dep ataıdy. Bul bizdi joǵary baǵalaı bilgeni dep eseptep, ári qaraı Qazaq jeri úshin, onyń jan-jaqty damýyna jan aıamaı, eńbek etýge daıynmyn.
Sondyqtan óz basym qazir qazaq tilin damytýda jumys isteı bastadym. Al meniń maqsatym jáne armanym Qazaqstandaǵy barlyq adamdardyń qazaqsha erkin sóıleı bilýi.
Vladıslav Ten
