Pavlodar qalasynyń №102 balabaqshasynyń tárbıeshileri men ata-analary «Meırimdi júrekter yntymaqtastyǵy» atty qaırymdylyq akııasyn ótkizdi.
Bala baqsha basshysy Sandýǵash Eleýsizovanyń aıtýynsha, akııaǵa barlyq tárbıelenýshilerdiń ata-analary qatysty.
«Balabaqshadaǵy 12 toptyń árqaısy 40-50 zattan jınap, barlyǵy 100 keliden astam zattar jınaldy. Kóbinese ata-analar kóktemgi kıetin aıaq kıimdi, sonymen qatar mektepke deıingi balalar men mekteptegi balalarǵa arnalǵan oıynshyqtar men kıimdi jáne eresekterdiń kıimderin ákeldi», - dedi Sandýǵash Qarataıqyzy.
Uıymdastyrýshylardyń aıtýynsha, is-sharanyń maqsaty – kóp balaly, muqtaj otbasylarǵa jáne múmkindigi shekteýli jandarǵa kómek kórsetý, balalardy adamgershilikke, meırimdilikke baýlý.
Akııa aqpannyń basynda jarııalanyp, eki aptaǵa jýyq jalǵasty. Ata-analar birinshi kúnnen bastap, balalardyń, eresekterdiń kıimin, oıynshyqtaryn ákele bastady. «Tárbıeshiler men ata-analar balalarǵa osy qaırymdylyq istiń mańyzdylyǵyn túsindirip, tek qana qajetti sapaly zattaryn tipti eń súıikti oıynshyqtaryn da ákelipti», - deıdi Sandýǵash Eleýsizova.
Búgin ata-analar men tárbıeshiler barlyq jınaǵan zattardy ortalyq «Máshhúr Júsip» meshitine tapsyrdy. Bul jerdegi ımamdar qaırymdylyq kómekti muqtaj otbasylarǵa, jalǵyzbasty analarǵa, múmkindigi shekteýli jandarǵa taratady.
Aıgúl Esenálıeva
Pavlodar qalasy
