QR Tuńǵysh Prezıdentiniń tóraǵalyǵymen Qaýipsizdik Keńesiniń otyrysy ótti.
Kezdesý barysynda Jambyl oblysy, Qordaı aýdanyndaǵy jaǵdaı, bıologııalyq qaýipsizdikti qamtamasyz etý jáne koronavırýs ınfekııasynyń taralýyna qarsy turý máseleleri qaraldy.
Kezdesýdi ashqan Nursultan Nazarbaev Qordaı aımaǵynda bolǵan oqıǵalardyń saldarynan qaza bolǵandardyń otbasylaryna kóńil aıtty jáne barlyq zardap shekkenderdiń tezirek saýyǵyp ketýlerine tilektes ekenin bildirdi.
"Qazirgi jaǵdaı meni qatty alańdatady. 30 jyl ishinde biz óz halqymyzben birge edáýir qıyndyqtardy bastan ótkerdik. Jastar bul problemalardy tipti elestete de almaıdy. Qazaqstandaǵy 130 kásiporyn óz qyzmetin toqtatyp, 2,5 mıllıon adam jumyssyz jáne tabyssyz qaldy, baspanalarda jylý bolmady, azyq-túlik tapshylyǵy boldy. Biz bárimiz osynyń barlyǵynan birge óttik», - dedi Elbasy.
Qaýipsizdik Keńesiniń Tóraǵasy Qazaqstan Táýelsizdik alǵannan keıin áleýmettik-ekonomıkalyq turǵyda úlken qıyndyqtardy bastan ótkergenin eske saldy.
- Eger biz kópultty halqymyzdy biriktirip, turaqtylyqty qamtamasyz ete almaǵanda, búginde elimizge sheteldik ınvestıııalar kelip, ekonomıka damymaıtyn edi. Árıne, memleket basshylaryna tıisti mindetter qoıyldy, biraq beıbitshilik pen kelisimdi saqtaý – eń aldymen, bizdiń halqymyzdyń mindeti, - dedi Nursultan Nazarbaev.
Buǵan qosa, Elbasy osy jaǵdaıdyń sebepterin muqııat zerttep, kinálilerdi zań normalaryna sáıkes jazalaýdy tapsyrdy.
- Bul problema aǵa býynǵa oı salýy kerek. Meniń Ult Kóshbasshysy retindegi maqsatym – Qazaqstandy bolashaq urpaq maqtana alatyndaı deńgeıge kóterý. Aǵa býynnyń mindeti – bizdiń ortaq maqsatymyzdyń táýelsiz, damyǵan jáne turaqty memleketimizdi saqtaý ekendigin adamdarǵa túsindirý, - dedi Qaýipsizdik Keńesiniń Tóraǵasy.
Elbasy qazirgi ýaqytta Prezıdent Q.J. Toqaevtyń tapsyrmasymen Úkimet pen oblys ákimdigi zardap shekken eldi-mekenderde qalypty ómirdi qalpyna keltirý úshin sharalar qabyldap jatqandaryn da atap ótti.
Sondaı-aq, jergilikti atqarýshy jáne quqyq qorǵaý organdarynyń, Qazaqstan halqy Assambleıasy men onyń aımaqtyq bólimsheleriniń jumys sapasyna erekshe nazar aýdaryldy.
- Assambleıa men onyń aımaqtyq bólimsheleri belsendi bolyp, mundaı jaǵdaılardy baqylaýda ustaýy kerek. Bul bizdiń ortaq mindetimiz, - dedi Qazaqstannyń Tuńǵysh Prezıdenti.
Kezdesý barysynda Jambyl oblysynyń ákimi B. Saparbaev, Ishki ister mınıstri E. Turǵymbaev jan-jaqty esep berdi.
Birinshi máseleni talqylaý aıasynda ortalyq memlekettik jáne jergilikti atqarýshy organdarǵa elimizdiń óńirlerindegi, onyń ishinde, jumyspen qamtý jáne ınfraqurylymdy damytý, áleýmettik obektilerdi qaıta qurý salasyndaǵy áleýmettik-ekonomıkalyq problemalardy sheshýge baǵyttalǵan baǵdarlamalardy odan ári iske asyrý tapsyryldy.
Otyrystyń kún tártibindegi ekinshi másele boıynsha Densaýlyq saqtaý mınıstri Eljan Birtanov baıandama jasady.
Qaýipsizdik Keńesiniń Tóraǵasy koronavırýsqa qatysty jaǵdaı Qytaı ekonomıkasyna da, Qazaqstan ekonomıkasyna da teris áser etýi múmkin ekenin atap ótti.
Biz «qol qýsyryp» otyrmaýymyz kerek. Barlyq jaǵdaıǵa daıyn bolyp, dári-dármektermen jáne basqa da qajetti resýrstarmen qamtamasyz etken jón. Bul máseleni baqylaýda ustaý qajet. Mundaı jaǵdaılarda qarsy sharalar atqarqarýǵa daıyn bolyp, syrtqy faktordyń ulttyq ekonomıkaǵa teris áserin boldyrmaý qajet », - dedi Nursultan Nazarbaev.
