Qazır Qordaidaǧy qaqtyǧys qyzu talqyǧa tüsıp tūrǧan sät. Resmi, beiresmi aqparatar qarşa borap, qarapaiym halyqqa aq pen qarany ajyratu da qiyndau bolyp tūr. Keşelı berı Qordai audanyna bırqatar BAQ ökılderı bardy.
«Adyrna» ūlttyq portalynyŋ tılşısı Oŋǧar Qabden de oqiǧa ornyna baryp, şynaiy aqparattar berıp otyr.
Tılşımızdıŋ aituynşa, qazır keşegı qaqtyǧysta ūstalǧandardy bosata bastaǧan. Oqiǧa ornynda arnaiy jasaq, qauıpsızdık qyzmetkerderı jūmystaryn jalǧastyruda. Qamaudan bosap şyqqandardyŋ arasynda tılşımızge sūhbat bergender de bolǧan.
«Auqatty auylynan 36 bala qamaldyq. Qordaidan 47 bala qamaldy. Halyqqa rahmet. Bızge kömektestı. 12 saǧat qamalyp otyrdyq. Eşqandai qorǧauşy berılmedı. Aramyzda jan-jaqtan kelgen jıgıtter boldy. Şymkent, Almaty, Tarazdan, Qyzylorda, Jarkent, Merkıden azamattar keldı. Halyqqa rahmet»,-deidı Nūrbol Älmahanbet.
Tılşımızge sūhbat bergen Qarakemer auylynyŋ tūrǧyndarynyŋ aituynşa, qazaqtar düŋgendermen būlai qaqtyǧysu turaly oilamaǧan.
«Qazaqtar düŋgendermen söilesuge eşqandai daiyndyqsyz barǧan. Olar töbelesemız dep oilamaǧan, jäi tıldesuge barǧan. Olardyŋ qolynda kürek, tas bolsa, düŋgenderdıŋ qolynda myltyq, avtomat boldy. Olar atty, tünı boiy atty. Eger kömektespegende jan-jaqtan kelmegende mūnyŋ arty qandai bolar edı?! Düŋgender «meşıtke baramyz, imandymyz» deidı. Ol ötırık, adamşy söz. Bızdıŋ qarusyz jürgen balalarymyz qamaldy. Al myltyq ūstaǧan olar qamalǧan joq, qaşyp jür. Būlardy köşıru kerek» ,- deidı Qarakemer auylynyŋ tūrǧyndary.
Eske salaiyq, 7 aqpanda keşkı saǧat 19:00-de Jambyl oblystyq polisiia departamentıne "Qordai audanynyŋ Masanchi auylynyŋ janynda 70-ten astam adam töbelesıp jatyr" degen aqparat tüsken. Zaŋsyz äreketterdı toqtatu üşın dereu polisiia qyzmetkerlerı jıberıledı. Sol jerde bolǧan adamdar töbelestı videoǧa tüsırıp, äleuemettık jelı arqyly taratqan.
Sonyŋ saldarynan jaqyn jerdegı Auqatty jäne Būlan batyr auyldarynan kelgen 300-den astam azamat töbeleske qosylady. Ekı jaq bır-bırıne tas laqtyryp, taiaqpen ūrǧan. Tıptı, qaru da qoldanǧan. Saldarynan 8 adam qaza boldy. 40-tan astamy jaraqat aldy. Olardyŋ ışınde oq tigen ekı polisei bar.
Jappai töbelestıŋ arty tärtıpsızdıkterge ūlasqan. Qazırgı mälımetke säikes, 30-dan astam jeke üi, 15 sauda üiı men 23 kölık zaqymdandy.
Işkı ıster ministrlıgı 47 adam ūstalǧanyn habarlady. Sotqa deiıngı tergeu şaralary qylmystyq kodekstıŋ 272-baby (jappai tärtıpsızdıkterdı ūiymdastyru jäne qatysu) men 99-baby (adam öltıru) boiynşa jürgızılıp jatyr.
Qarlyǧaş ZARYQQANQYZY,
"Adyrna" ūlttyq portaly
https://youtu.be/rzabJT0VxzM
