Jambyl oblysyndaǵy Shý temirjol stanııasynda koronavırýs juqtyrdy degen kúdikpen eki Qytaı azamatyn poıyzdan túsirilip, aýrýhanaǵa jetkizildi. Dárigerlerdiń tekserýinen keıin, eki jolaýshynyń deni saý ekeni anyqtalǵan, - dep habarlaıdy Tengrinews.kz Shý qalalyq ákimdiginiń baspasóz qyzmetine silteme jasap.
Jelide Shý qalasynyń vokzalynda koronavırýs juqtyrdy degen kúdikpen poıyzdyń toqtatylǵany týraly málimetter taraǵan. WhatsApp messendjeri arqyly kýágerler oqıǵa ornynda túsirilgen sýretterdi taratqan, onda dárigerler arnaıy kostıýmder kıip, poıyzǵa qaraı júgirgen.
Shý qalalyq ortalyq aýdandyq aýrýhanasynyń bas dárigeriniń málimetinshe, 29 qańtarda Saryaǵash - Nur-Sultan baǵytynda júretin № 86 poıyzdan túsirilgen Qytaı azamattarynan eshqandaı vırýs belgileri anyqtalmaǵan. Sonymen qatar, arnaı jasaq ókilderi poıyz jolaýshylaryn qarap shyqqan, eshkimnen koronavırýs anyqtalmaǵan.
"Túshkirdi dep kúdik keltirgen qytaı azamattary aýdandyq juqpaly aýrýhana bólimine jetkizildi. Azamattardy tekserý nátıjesinde vırýs belgileriniń joq ekendigi anyqtalyp otyr. Oblystyq deńgeıdegi epıdemıologtardyń nátıjesi belgili bolǵansha jaǵdaı baqylaýda bolady. Aýdanymyzda qaýipti indettiń aldyn alý úshin arnaıy jabdyqtalǵan jedel járdem jumys jasaıtyndyǵyn eskertemiz. Aýdan turǵyndarynyń dúrlikpeýin suraımyz", - delingen habarlamada.
Eske salaıyq, Qytaı bıligi 2019 jyly 31 jeltoqsanda Dúnıejúzilik densaýlyq saqtaý uıymyna Ýhan qalasynda belgisiz vırýstyń taraı bastaǵanyn habarlaǵan. Mamandar Ýhan qalasyndaǵy teńiz ónimderi bazarynan alynǵan synamalardy zerttep, vırýstyń qaınarkózi sol bazarda satylǵan jabaıy janýarlar bolǵanyn anyqtaǵan. Qytaıda koronavırýstan qaza tapqandardyń sany 132-ge jetti.
