Búgin «Aq jol» partııasynyń tóraǵasy, Májilis depýtaty Azat Perýashev Májilistiń jalpy otyrysynda «Bek Air» áýe kompanııasyna tıesili ushaq apatyna qatysty Premer-mınıstr men Bas prokýrordyń atyna depýtattyq saýal joldady.
«Ushaq syrtyndaǵy muzdy eritýge arnalǵan suıyqtyqty únemdedi degen jeleýmen taǵy da qaza tapqan ushqyshtardy kináli etip shyǵaratyndaı kórinedi. Olardyń basyn báıgege tigýi – ekeýiniń tańdaýy emes. Baqılyq bolǵandar ózderin qorǵaı almaıdy. Bulaı isteýleri durys pa?», - dedi depýtat A.Perýashev.
«Aq jol» frakııasynyń depýtattary tasymaldaýshy kompanııa qaza tapqandardyń otbasy men zardap shekkenderge ótemaqy tólemegenderin aıtty. Sondaı-aq, «Bek Air» qaıǵyly oqıǵadan keıin toqtatylǵan áýe reısterine bılet alǵan jolaýshylardyń aqshasyn áli kúnge deıin qaıtarmaǵan.
«Zańdy ótemaqy tólenbegen, zardap shekkenderge qoldaý sharalary kórsetilmegen. «Bek Air» ókilderi aýrýhanaǵa baryp, jaraqat alǵan jandardyń jaǵdaıyn bilýge de jaramady. Tipti, qaza tapqandardyń jerleý rásiminde de boı kórsetpedi. Áýe kompanııasy qaıǵyly oqıǵaǵa tikeleı qatysty joqtaı, tek BAQ arqyly kóńil aıtty», - dedi depýtat.
Eske sala keteıik, ótken jyldyń 27 jeltoqsanynda Almaty qalasynyń mańynda «Almaty – Nur-Sultan» baǵytyndaǵy «Bek Air» kompanııasyna tıesili Fokker 100 ushaǵy apatqa ushyrap, 12 adam qaza taýyp, 67 adam túrli jaraqatpen aýrýhanaǵa tústi.
"Adyrna" ulttyq portaly
