Qazaqstannyŋ eks-prezidentı Nūrsūltan Nazarbaevtyŋ jienı, senat spikerı Dariǧa Nazarbaevanyŋ ūly Aisūltan Nazarbaev ömırıne qauıp tönıp tūrǧanyn aityp qaldy. Ol Facebook paraqşasyndaǧy bırneşe jazbasynda jäne aqparat qūraldaryna bergen sūhbatynda "qauıp öz otbasynan" ekenın mälımdedı.
Aisūltannyŋ (byltyr London soty polisiiaǧa şabuyldady dep şartty jaza kesıp, esırtkıge täueldılıkten emdeuge jıbergen) jazbalary men aitqandaryna Nazarbaev äuletı äzırge eşqandai pıkır bıldırgen joq.
23 qaŋtarda Azattyq tılşısı senat otyrysynan şyqqan Dariǧa Nazarbaevaǧa ūlynyŋ sözıne qatysty pıkır aluǧa tyrysqanymen, nätije şyqpady. Parlamentte küzet küşeidı. Būryn Nazarbaevany ekı adam küzetetın edı, būl joly onyŋ janynda kem degende alty küzetşı jürdı. Küzetşılerdıŋ bırı tılşınıŋ qolyn qaiyryp, auzyn japty. Kedergıge qaramastan Azattyq tılşısı Dariǧa Nazarbaevadan "ūlynyŋ ömırıne qandai qauıp tönıp tūrǧanyn" sūrap ülgerdı. Bıraq Nazarbaeva tılşı sūraǧyn jauapsyz qaldyrdy.
22 qaŋtarda Aisūltan Nazarbaev ūzaq üzılısten keiın Facebook paraqşasynda bırneşe post jariialady. Onda ol "türmede otyryp şyqqanyn", "jaqyndarymen köp mäsele bolǧanyn" jazdy. Aisūltan postynda qazır Londondaǧy Priory Hospital Hayes Grove klinikasynda (18 qazanda aǧylşyn soty Aisūltandy esırtkıge täueldılıkten emdeluge mındettegen) jatqanyn da aitty. Ol jazbasynda telefon nömerın qaldyryp (Azattyq būl nömerge habarlasqanymen jauap bolmady), jurnalister sūraǧyna jauap beruge daiyn ekenın aitqan. Jazuynşa, ömırıne qauıp tönıp tūr jäne ony bıreuler öltırgısı keledı. Aisūltan Ūlybritaniia hanşaiymynan Nūrsūltan Nazarbaevqa habarlasudy da sūraǧan.
Aisūltan Facebook paraqşasynda"Menıŋ şeşem atamdy qarmaqta ūstap otyr. Sebebı ol menıŋ äkem" ("Moia mat derjala deda na kriuke iz za togo chto ia ego syn") dep jazdy.
Jelı qoldanuşylarynyŋ arasynan Aisūltannyŋ paraqşasyn bıreuler būzyp kırgen degender de tabyldy. Keiın qazaqstandyq jurnalister Aisūltan Nazarbaevqa habarlasyp, sūhbat alǧan. Aisūltan Facebook paraqşasyna özı jazyp otyrǧanyn aitty. Videoda onyŋ Priory klinikasynda otyrǧany baiqalady.
Azattyq britaniialyq klinikaǧa habarlasty. Auruhana pasientterı jaily aqparat bermeitının, emdeluşıler turaly derekter jeke bas qūpiiasy ekenın aitty.
Nūrsūltan Nazarbaev (prezident bolyp tūrǧan kez) äielı Sara Nazarbaeva jäne jienı Aisūltanmen bırge oiyn-sauyq ortalyǧynyŋ aşyluynda tūr. Almaty, 1997 jyl. Suret Aqordanyŋ Instagram-daǧy paraqşasynan alynǧan
23 qaŋtarda Aisūltan Nazarbaev taǧy da jūmbaqtaǧan post jariialap, "älemdı jaulap alǧan siqyr jaily" jazdy. Odan keiın Mūhtar Äbliazovtyŋ (10 jyl boiy şetelde tūryp jatqan eks-bankir, Nazarbaev pen Qazaqstan bilıgın synap jürgen oppozisiialyq saiasatker. Nūr-Sūltan ony bırneşe qylmysqa aiyptap, elge ekstradisiialauǧa talpynyp keledı. Äbliazov aiyptardyŋ saiasi astary bar dep sanaidy) habarlasuyn sūrap, taǧy bır post jariialady. Bırneşe saǧattan soŋ Äbliazov Facebook jelısınde tıkelei efirge şyǧyp, Aisūltanmen söileskenın, oǧan şeşesı tarapynan qauıp tönıp tūrǧanyn aitty.
"Onyŋ ömırıne qauıp tönıp tūr. Ol özın Rahat Äliev siiaqty öltırıp tastai ma dep qauıptenedı" dedı Äbliazov.
Rahat Äliev – Dariǧa Nazarbaevanyŋ būrynǧy küieuı, diplomatiialyq qyzmetterde ıstegen. 2007 jyly quǧanǧa ūşyrap, 2015 jyly aqpanda Vena türmesınde ölı küiınde tabyldy. Resmi tergeu ol suisid jasaǧan degen şeşımge kelgen. Al Älievtıŋ ekınşı äielı Elnara Şorazovanyŋ advokattary germaniialyq ekspertterge sıltep, Älievtı öltırıp kettı degen.
Dariǧa Nazarbaeva senat otyrysynda. Nūr-Sūltan, 23 qaŋtar 2020 jyl.
Azattyq Aisūltan Nazarbaevqa "töngen qauıp jaily" Qazaqstannyŋ Ūlybritaniiadaǧy elşılıgınen kommentarii ala almady. Telefon tūtqasyn kötergen elşılık qyzmetkerı qandai da bır aqparat beruge ökıletı joǧyn aitty. Ol tılşı sūraǧyn aqparat qūraldarymen bailanysqa jauapty qyzmetkerge jetkızetının aityp, redaksiia nömerın jazyp aldy. Bıraq elşılık tarapynan redaksiiaǧa eşkım habarlaspady.
Qazaqstannyŋ eks-prezidentı Nūrsūltan Nazarbaevtyŋ äkımşılıgıne habarlasu mümkın bolmady. Kanseliariianyŋ baspasöz hatşysy Aidos Ükıbaev telefonǧa jauap bermedı.
Nūrsūltan Nazarbaev 2019 jyly nauryzda prezidenttıkten ketken. Bıraq Qauıpsızdık keŋesı men "Nūr Otan" partiiasynyŋ basşysy retınde eldegı bilıktıŋ bır bölıgın ūstap otyr. Onyŋ "Ūlt köşbasşysy" statusy bar. Būl märtebege sai, Nazarbaev jäne onyŋ otbasy qylmystyq jauapkerşılıkke tartylmaidy.
Aisūltan Nazarbaev – Dariǧa Nazarbaevanyŋ ekınşı ūly. Nazarbaeva men Älievtıŋ taǧy Nūrälı Äliev (2014-16 jyldary Qazaqstan astanasy äkımınıŋ orynbasary bolǧan) jäne Venera Nazarbaeva esımdı balalary bar.
Aisūltan Ūlybritaniiada koroldık äskeri akademiiada oqyp, Qazaqstanǧa oralǧan. Keiın ol Qazaqstan qorǧanys ministrlıgı barlau basqarmasyna jūmysqa tūrǧan. 2017 jyly jetı aidai Qazaqstan futbol federasiiasynyŋ vise-prezidentı boldy. Keiın ol jelıdegı paraqşasynda esırtkı şekkenın, odan emdelgenın jazdy da bıraz uaqyt jūrt közınen tasada boldy.
Byltyr qazanda London soty Aisūltandy şartty jazaǧa kesıp, "18 ai synaqta bolyp, 140 saǧat qoǧamdyq jūmysqa jegıledı jäne mäjbürlı türde esırtkıge täueldılıkten emdeledı, bır myŋ funt aiyppūl (1300 dollar) men bes myŋ funt (şamamen 6500 dollar) şyǧyndy töleuı tiıs" dep şeşım şyǧarǧan.
Sot Aisūltan Nazarbaevty britan polisiiasyna qarsylyq körsetkenı üşın jauapqa tartqan. Is materialdaryna sai, Covent Garden aimaǧyndaǧy päterdıŋ balkonyna şyǧyp alǧan belgısız er adamdy körgen tūrǧyndardyŋ bırı polisiia şaqyrǧan. Polisiia kelgende er adam "esırtkı äserımen polisiiaǧa qarsylyq körsetken, qol jūmsap, tıstegen". Keiın balkonǧa şyǧyp alǧan er adamnyŋ Aisūltan ekenı anyqtalǧan. Üidıŋ iesı Aisūltanmen tanys emesın, onyŋ päterge qalai kırgenın bılmeitının aitqan. Polisiia Aisūltandy ūstau üşın elektroşoker qoldanuǧa mäjbür bolǧan. VVS saity Aisūltan elektroşokerdı syndyryp tastaǧanyn, polisiianyŋ qolyn jaraqattaǧanyn jazdy.
Tört aidan keiın London soty Aisūltan Nazarbaevqa ükım şyǧardy. Sot Aisūltan bostandyqta jürıp, emdeluıne bolady degen şeşımge kelgen.
Būl sotqa qatysty Nazarbaev äuletı eşqandai pıkır bıldırgen joq.
"Azattyq" radiosy
