Taıaýda Qazaqstan oryndaýshylar odaǵynyń basqarma tóraǵasy bolǵan Meırambek Bespaev depýtat Zaǵıpa Balıeva jumysyma kedergi keltirip, qysyp kórsetip jatyr dep málimdegen edi
Májilis depýtaty Zaǵıpa Balıeva tanymal ánshi Meırambek Bespaevtyń málimdemesin talqylaýǵa daıyn ekenin jetkizdi, dep habarlaıdy Sputnik Qazaqstan tilshisi.
"Dál qazir men Meırambektiń qońyraý shalǵanyn kútip otyrmyn. Myna jerde on adam bolyp jınalyp otyrmyz. Men áleýmettik jelige óz telefonymdy salyp, maǵan qońyraý shalýyn suradym. Endi, bárimiz Meırambektiń qońyraýyn kútip otyrmyz. Onyń qandaı aryz-talaby bar ekenin bilgimiz keledi", - dedi Balıeva.
Al Sputnik Qazaqstan tilshisiniń "Meırambek óz aryz-talabyn áleýmettik jelige jazǵan joq pa?" degen suraǵyna: "Ol menen suraý kerek qoı. Oǵan ózim jaýap bergim kelip otyr", - dep qysqa qaıyrdy.
Aıta keteıik, tanymal ánshi Meırambek Besbaev óziniń áleýmettik jelidegi paraqshasynda májilis depýtaty Zaǵıpa Balıeva jumysyna kedergi keltirip, qysyp kórsetip jatqanyn jazdy.
Buǵan deıin ánshiler biraýyzdan daýys berip, Meırambek Besbaevty Qazaqstan oryndaýshylar odaǵynyń basqarma tóraǵasy etip saılaǵan bolatyn.
"Endi kelip, burynǵy basshylyq jańa basshylyqqa qarsy qoqań-loqqy kórsetip, ártúrli jaǵymsyz áreketter arqyly qarsylyq kórsetýde. Burynǵy basshylyqtyń artynda sizdiń ulyńyz jáne ózińiz tur ekensiz. Siz zańdy túrde saılanǵan maǵan, basqarma múshelerine qysym kórsetip, ártúrli memlekettik jáne quqyq qorǵaý organdaryna telefon shalyp jatyr ekensiz. Munyńyz múlde durys emes dep bilemiz!", - dedi Meırambek Besbaev.
