Belarýstiń "Naftan" jáne "Mozyrskıı" munaı óńdeý zaýyttary 1 qańtardan bastap Reseıden shıkizat ákelýdi toqtatqanyn habarlady. Bul aqparatty Azattyqtyń Belarýs qyzmeti taratty.
Máskeý men Mınsk áli kúnge deıin tasymaldanatyn munaı baǵasy, Belarýs aýmaǵy arqyly ótetin shıkizat tranzıtiniń tarıfi jáne Reseıdiń salyq júıesindegi ózgeristerge baılanysty shyǵynǵa batqan Belarýstiń munaı óńdeý zaýyttaryna ótemaqy tóleý máselesi boıynsha kelisimge kele almaı otyr.
Munaı óńdeý zaýyttary 1 qańtardan bastap Reseı shıkizatyn tasymaldaýdy tolyq toqtatqanyn, munaı kompanııalarymen jańa kelisim bolmaǵanyn aıtty. "Naftan" men "Mozyrskıı" ótken jyldan qalǵan ónimdermen jumys istep jatyr.
"Belneftehım" ókili "Interfaks" agenttigine tasymaldaýdyń toqtaǵanyn rastap, zaýyttardyń júktemesi azaıǵanyn aıtty. Reseılik operator "Transneft" ókilderi qazirgi kezde Belarýske munaı tasymaldaý boıynsha ótinish túspegenin jetkizdi. Biraq olardyń aıtýynsha, Belarýs arqyly tranzıtke shekteý joq.
Mınskige munaı tasymaldaý boıynsha kelisim merzimi 1 qańtarda aıaqtalǵan. Alaıda taraptar tasymaldaý sharttary boıynsha kelisimge kele almaǵan. Sarapshylardyń aıtýynsha, Belarýs baǵany arzandatýdy surasa, Reseı munymen kelispeıdi. Mınsk shıkizat tasymaldaýdyń balama joldaryn izdeıtinin málimdegen.
Kremldiń baspasóz hatshysy Dmıtrıı Peskov ázirge Mınskimen kelisim jasalǵan joq, biraq dıalog ári qaraı da jalǵasa beredi dedi.
"Azattyq" radıosy
Foto avtory Laslo Balog (Reıter)
