Týra 25 jyl buryn. 1994 jyl, 31-jeltoqsan. Groznyı qalasy. Reseı áskeri Sheshenstan astanasyna kirip, bir aı buryn týyndaǵan áskerı konflıktini túbegeıli sheshpek boldy.
1994 jyly, 11 jeltoqsanda "Birinshi sheshen soǵysy" bastaldy. Orys áskeri Sheshenstanǵa basyp kirdi. Alaıda kılikkenge Ichkerııa ılikpedi.
"Jańa Jyldyq shabýyl" kezinde Reseı áskeri Ekinshi dj soǵystan keıingi eń úlken shyǵynǵa ushyrady. Keı derekterge súıenetin bolsaq, 1 qańtar RF qorǵanys mınıstri Pavel Grachevtiń týǵan kúni bolatyn. Sondyqtan qolbasshynyń týǵan kúnine Groznyıdy syıǵa tartýǵa beıresmı buıryq berilgen. Grachevtiń ózi bolsa "kimde-kim Prezıdent saraıyna týdy birinshi tikse, sol Reseı batyry" ataǵyn alady dep ýáde berdi. Qalaǵa basyp kiretin 4 qolbasshynyń barlyǵyna 4 tý berildi. Grachev jýrnalısterge "Groznyı jáne sheshen máselesi túngi 12-ge deıin tolyq sheshiledi" dep suhbat berdi. Alaıda Grachevke syılyqqa Groznyı emes, tabyttar kelip jatty.
Basynda shabýyl sátti ótkendeı kórindi. Tań atysymen 31-jeltoqsanda Groznyıǵa 15 myń muzdaı qarýlanǵan orys áskeri kirdi. Olar kishigirim qarsylyqtardy joıa otyryp, qala ortalyǵyna jetti. "Qalany aldyq" degen habarlama basshylyqqa jetip jatqan bolatyn. Alaıda bul qalany qorǵaý tapsyrylǵan Aslan Mashadov qurǵan taktıka edi.
Kún uıasyna kirdi. Sol sátte Reseı sarbazdary úshin naǵyz tozaq bastaldy. Qarańǵylyqpen birge qara túnek qosa keldi. Groznyıdaǵy ár úıdiń terezesinen, ár kósheniń qıylysynan, ár aǵashtyń túbinen oq qarsha borady. Granatometter tankterdi órtep jatty. Atys arasynda "Jańa jylyńmen Reseı" degen daýystar estilip turdy. Bul rasymen Ichkerııanyń Reseıge Jańa Jyldyq syılyǵy bolatyn. Túngi 12-de soǵystyń bitkenin jarııalamaq bolǵan Grachev, "Kómek jiberińder" degen habarlamany mınýt saıyn alyp otyr.
Bir kúnniń ishinde Reseı áskeri 26 T-72 tankisiniń 20-syn, 120 BMP-nyń 102-sin, 6 ZPRK «Týngýska» zenıttik qondyrǵysyn tolyqtaı joǵaltty. Adamı shyǵyn 1000-nan asty. Osylaısha 12-de aıaqtalýǵa tıis soǵys, 2 jylǵa sozylyp ketti.
Ashat Qasenǵalıdiń Feısbýk paraqshasynan
