4 myń adam «Qara jorǵany» birge bıledi

3828
Adyrna.kz Telegram

«Qara jorǵa» qazaq bıiniń brendine aınalyp keledi desek, áste qatelespeıtin shyǵarmyz. Toı halyqtyń qazynasy bolsa, «Qara jorǵa» bıi qazaqtyń sol qazynasynyń tórinen oıyp oryn aldy. Óıtkeni bul kúnde «Qara jorǵa» bılenbeıtin toı kemde-kem. Budan biraz ýaqyt buryn «Alash aınasy» gazeti osy ulttyq bıimizdiń shıpajaılarda da emdeý-saýyqtyrý bıi retin­de qoldanyla bastaǵanyn ja­zyp edik. Endi, mine, «Qara jor­ǵa» ulttyq-patrıottyq is-shara­lardyń da ajaryn ashyp, sánin keltiretin bıge aınalyp keledi.

Keshe Qazaqstan halqy tilderiniń festıvali aıasynda elordadaǵy Qazaq gýmanıtarlyq zań ýnıversıtetiniń aldynda osy joǵary oqý ornynyń stýdentteri men oqytýshylary – bas-aıaǵy shamamen 4 myńǵa jýyq adam «Bıleıik birge, Qara jorǵa» patrıottyq akııasyn «Qara jorǵa» bıimen ashty.

Aıtqandaı, akııanyń ashylý rásiminde óziniń bala kezinde osy bıge bılegenin esken alǵan ýnıversıtettiń prezıdenti Maqsut Nárikbaev ta «Qara jorǵaǵa» jorǵa ekenin kórsetip, stýdenttermen birge bıledi. Ádil baǵasyn bere keteıik, alpysty alqymdaǵan Maqsut Sultanuly býyndary bylqyldap bılegende jıyrmadaǵy jasty tánti etetindeı-aq táp-táýir bıshi eken.

Al qalǵan stýdentterdiń basym kópshiligi bıdi tolyq mánerinde bıleı almaı, qol men ıyqty qozǵaltqannan árige barmady. Biraq eshteńe etpes, áli-aq bir kisideı qozǵalyp, bılep keter degen úmittemiz. Óıtkeni ýnıversıtet basshysy endigi ýaqytta stýdentterdi tańerteń oqý ornyna jarty saǵat buryn kelýge shaqyryp, Ánurannan keıin «Qara jorǵa» bıleýdi ádetke aınal­dyrýdy usyndy. Nesi bar, búkil qytaı tań­nan turyp, ý-shý jattyǵyn istep jatqanda, biz de boıymyzǵa qan júgirtip, «Qara jor­ǵamen» kúndelikti tirlikti bastasaq, salaýat­ty ómir salty degen sol bolar.

Maqsut NÁRIKBAEV,Qazaq gýmanıtarlyq zań ýnıversıtetiniń prezıdenti:

– Biz – barlyq jaǵynan talantty ha­lyq­pyz. Án men kúı, bı sekildi óner týyn­dylarymyz da kóp. Biraq sóıte tura, ózimizdiń toı-tomalaqtarymyzda ózge jurttyń áýeni men bıin bılep júr­miz. Osy úrdisti ózgertip, nege biz ózi­mizdiń ulttyq bıimizdi bılemeımiz? Bú­gin­gi patrıottyq akııada «Qara jorǵa» bıin bıleıik degen oı osy maqsattan tý­dy. Al «Qara jorǵa» bıi, onyń áýeni men qımyl-qozǵalysy halyqqa etene ja­qyn. Onyń áýeninde ásirese qazaq ulty­na rýh beretin kúsh bar. Bizdiń osy bas­tamamyzdy L.Gýmılev atyndaǵy Eý­ra­zııalyq ulttyq ýnıversıtet te qol­dap, tústen keıin olar da ýnıversıtet bo­lyp bir mezgilde «Qara jorǵa» bıin bı­legeli otyr. Sondyqtan men ózge jo­ǵary oqý oryndaryn da osy basta­ma­myzǵa qosylýǵa shaqyramyn.


Aıbyn Baqytuly,

«Alash aınasy».

 

Pikirler