Qazaqstan azamattary mobildı qūrylǧylardy IMEI-kod arqyly mındettı türde verifikasiialau tärtıbıne şaǧymdanyp jatyr. Osyǧan bailanysty Mäjılıs deputaty Bolatbek Najmetdinūly Ükımetke resmi deputattyq saual joldady, dep habarlaidy "Adyrna" ūlttyq portaly.
Halyq qalaulysy būl prosestı resmi märtebesı joq, konkurs ötkızbei, ATS Mediafon KZ jüzege asyryp jatqanyna alaŋdauşylyq bıldırdı.
«Kompaniia būl qyzmettı zaŋ jüzınde eşqandai qūqyqtyq negızsız ūsynyp otyr. Konkurs ötpegen, memlekettık rūqsat berılmegen, qyzmet qūny bır jaqty belgılengen. Sonymen qatar, kompaniia azamattardyŋ JSN, aty-jönı, bailanys nömırı men qūrylǧysynyŋ IMEI-kody siiaqty jeke derekterın zaŋsyz jinauda», – dedı deputat.
Ol qazaqstandyqtar men käsıpkerlerden būl jüiege bailanysty köptep şaǧym kelıp tüsıp jatqanyn aitty. Mälımetterge süiensek, elde 12 millionǧa juyq mobildı qūrylǧy tiıstı türde tırkelmegen. Är qūrylǧyny verifikasiialau qūny – 3 932 teŋge.
Sonymen qatar, Najmetdinūly būl shema bäsekelestıkke qaişy ekenın, al şyǧyndar halyqqa zaŋsyz jüktelıp jatqanyn atap öttı. Sarapşylardyŋ baǧalauynşa, Qazaqstan naryǧyndaǧy qūrylǧylardyŋ 75%-y kedendık räsımdersız zaŋsyz engızılgen. Būl jyl saiyn biudjetke 150 mlrd teŋge kölemınde şyǧyn äkeledı.
«ATS Mediafon KZ qandai normativtık-qūqyqtyq aktılerge süiene otyryp būl qyzmettı körsetıp otyr? Qandai şeşımmen jäne kımnıŋ tarapynan taŋdaldy? Qyzmet qūny qalai esepteldı jäne jeke derekterdı jinauǧa qandai zaŋdy negız bar?» – dep saual qoidy deputat.
Mäjılısmen verifikasiia prosesın toqtatyp, būl funksiiany uäkılettı memlekettık organǧa berudı, al zaŋbūzuşylyqtar anyqtalǧan jaǧdaida azamattar men käsıpkerlerge tölemderdı qaitarudy ūsyndy. Sonymen qatar, sūr import shemalaryn anyqtau boiynşa tergeu jürgızu qajettıgın aitty.
Aita keteiık, būǧan deiın sifrlyq damu ministrlıgı şetelden äkelıngen smartfondardy mındettı tırkeu jüiesın engızetının habarlaǧan. Är qūrylǧy üşın 4 000 teŋge töleu qajet bolady, alaida būl qarajatty memlekettık organ emes, jeke kompaniia jinaidy.
