Qazaqstannyŋ Syrtqy ıster ministrlıgı Reseide “terrorizmdı nasihattady jäne aqtady” degen aiyppen ūstalǧan qazaqstandyq studentke qatysty aqparatty tekserıp jatqanyn mälımdedı, dep habarlaidy “Adyrna” ūlttyq portaly.
Būǧan deiın Sankt-Peterburgtegı RF Tergeu komitetınıŋ Bas tergeu basqarmasy şeteldık studenttıŋ ūstalǧany jönınde aqparat taratty. Basqarma ūstalǧan adamnyŋ azamattyǧyn naqtylamaǧanymen, oǧan RF QK 205.2-babynyŋ 2-bölıgı («terroristık ärekettı jariia türde aqtau jäne nasihattau») boiynşa aiyp taǧylyp otyrǧanyn habarlady.
Tergeu organdarynyŋ aituynşa, ūstalǧan student qaŋtar-aqpan ailarynda "Jūmysşylar bilıgı" ūiymynyŋ sezınde "terrorizmdı aqtaityn ūrandar" kötergen. Tıntu kezınde odan "propagandistık ädebiet" tärkılengen. Vedomstvo şetel studentınıŋ qai elden kelgenın aitpady.
"Rotonda" saitynyŋ jazuynşa, ūstalǧan adamnyŋ aty-jönı – Garri Azarian, 23 jasta, Qazaqstan azamaty. Qūqyq qorǧauşylardyŋ deregıne süiengen küştık qūrylym ökılderı studentter Oleg Rubiş, İrada İbragimova, Denis Koval jäne Kirilldıŋ (tegın aitqan joq) päterlerın tıntken. Soŋǧy atalǧan adamnyŋ soqqyǧa jyǧylǧany da habarlandy.
Aqparatqa qaraǧanda, Azarian studentterdıŋ beiresmi jiynynda “revoliusiia, taptyq jekköruşılık, köşenıŋ küşı” turaly aitqan. Tergeuşıler onyŋ būl sözınen memlekettık qūrylymdy küştep özgertu men bilıktı auystyruǧa şaqyru belgılerın körgen.
"Jūmysşylar bilıgı" ūiymy turaly säuır aiynyŋ soŋynda Reseidıŋ bilıkşıl basylymdary jazǧan. RİA Novosti sūhbat alǧandardyŋ bırı "Jūmysşylar partiiasyn"" Ūlybritaniiadan basqarylatyn jäne jaǧdaiy jaqsy jūmys ıstemeitın studentterden jasaqtalǧan studentter toby" dep sipattaǧan.
Agenttık mälımetınşe, «Jas revoliusionerler» 18 jasqa tolǧan boida öz tobyn qūryp, solşyl radikaldy «Kommunister-internasionalister ūiymynyŋ» qoldauyna ie bolǧan. Būl ūiym Ūlybritaniiada ornalasqan, troskizmdı jaqtaityn ideolog Alan Vuds basqaratyn halyqaralyq odaq qūramyna kıredı.
