Bügın Memlekettık qyzmet ısterı agenttıgınıŋ töraǧasy Darhan Jazyqbai Prezidenttık jastar kadr rezervıne kezektı ırıkteudıŋ erekşelıkterı men kezeŋderı turaly aitty.
Agenttık töraǧasy, Prezidenttık jastar kadr rezervı – daryndy, bastamaşyl, käsıbi bılıktı jastardy memlekettık basqaru jüiesıne tartuǧa baǧyttalǧan maŋyzdy joba ekendıgıne nazar audardy. Memleket basşysy Prezidenttık jastar kadr rezervınıŋ forumynda atap ötkendei, «elımızdegı biznes, auyl şaruaşylyǧy, qarjy, medisina, bılım jäne basqa da sektorlarda tabysty eŋbek etıp jürgen adamdar jetkılıktı. Naqty nätijege ūmtylyp, tūtynuşynyŋ qajettılıgın öteu üşın jūmys ısteitın osyndai mamandardyŋ äleuetın jūmyldyru kerek».
Būǧan deiın 2019, 2021 jäne 2023 jyldary ötken ırıkteulerge qatysuǧa jalpy 60 myŋnan astam qazaqstandyqtar qyzyǧuşylyq tanytty. Irıkteuler qorytyndysy boiynşa rezervke 400 adam qabyldandy. Bügınde olardyŋ 318-ı jauapty qyzmetterge taǧaiyndalyp, ekonomikanyŋ türlı salalarynda elımızdıŋ damuyna öz ülesterın qosuda.
Atap aitqanda, 167 - ortalyq memlekettık organdarda, 37 -jergılıktı atqaruşy organdarda, 62 - ūlttyq kompaniialarda, 52 - özge ūiymdarda qyzmet atqaruda. Sondai-aq 39 rezervşı saiasi lauazymdarda, 3 - «A» korpusynyŋ lauazymdarynda, 2 - Mäjılıs deputaty, 1 - mäslihat deputaty bolyp qyzmet etude.
Darhan Jazyqbaidyŋ aituynşa, biylǧy ırıkteudıŋ basty erekşelıgı – är baǧyt boiynşa kandidattardyŋ bırkelkı sanyn qamtamasyz etu maqsatynda ärbır kezeŋde proporsionaldy ırıkteu ötkızu. Rezervtıŋ är salalyq baǧyty boiynşa kvotalar qarastyrylyp, ırıkteu sol salalyq baǧyt boiynşa ǧana jürgızıletın bolady. Būl ädıs salalar arasyndaǧy teŋgerımdı qamtamasyz etıp, naqty baǧyttar boiynşa ümıtkerlerdı ırıkteudı qamtamasyz etedı.
Irıkteu memlekettık apparattyŋ salalyq kadrlarǧa qajettılıgın eskere otyryp, infraqūrylym, önerkäsıp jäne sauda saiasaty, agroönerkäsıptık keşen jäne qorşaǧan orta, syrtqy saiasat jäne investisiialar; ekonomikalyq jäne qarjylyq saiasat, sifrlandyru, äleumettık saiasat jäne azamattyq qoǧam syndy 6 negızgı sala boiynşa jürgızıledı. Kandidat tırkelu kezınde körsetılgen salalyq baǧyttardyŋ bırın taŋdauy qajet.
Ümıtkerlerge qoiylatyn talaptar özgerıssız qalady: ırıkteuge jasy 35-ten aspaǧan, joǧary bılımı jäne 5 jyl jalpy jūmys täjıribesı bar, memlekettık tıldı V1 deŋgeiınen tömen emes meŋgergen Qazaqstan Respublikasynyŋ azamaty qatysa alady.
Prezidenttık jastar kadr rezervınıŋ müşesı bolu üşın ümıtkerler 6 kezeŋnen tūratyn keşendı ırıkteuden ötuı tiıs.
Qūjattardy qabyldau – 1-30 mausym aralyǧynda pkrezerv.gov.kz resmi platformasynda onlain rejimde jüzege asyrylady. Irıkteudıŋ obektivtılıgın qamtamasyz etu üşın kandidattardyŋ derekterı jeke nömır beru arqyly jasyrylady. Baǧalauşylar üşın ümıtkerdıŋ kım ekendıgı beimälım bolady.
Mätındık jäne sandyq aqparatpen jūmys ısteu qabıletın baǧalau – testıleu proktoring jüiesımen, audio jäne beinefiksasiiamen ötedı, ädıldık pen aşyqtyq qamtamasyz etıledı. Talaptarǧa säikes keletın barlyq kandidattar mätındık aqparatpen jūmys ısteu qabıletın baǧalaudan ötedı. Būl rette sandyq testıleuge är salalyq baǧyt boiynşa eŋ köp ball jinaǧan kandidattardyŋ 50%-y jıberıledı.
Situasiialyq tapsyrmalardy şeşu kezeŋı – kandidattardyŋ taŋdaǧan salalyq baǧyttaryna bailanysty naqty problemalardy şeşu boiynşa ūsynystaryn baǧalauǧa baǧyttalǧan. Būl kezeŋ onlain-rejimde esse jazu formatynda ötedı.
Assessment-ortalyǧy men qūzyretter boiynşa sūhbat – oflain formatta, Prezident janyndaǧy memlekettık basqaru akademiiasynda ötetın būl kezeŋde ümıtkerler mınez-qūlyq indikatorlary jäne käsıbi qūzyretter boiynşa toptyq jäne jeke tapsyrmalardan ötedı. Onlain formattaǧy jeke sūhbat käsıbi HR-menedjerlermen ötkızıledı.
Sarapşylyq komissiiamen äŋgımelesu – arnaiy komissiiamen sūhbattasu türınde jüzege asyrylady. Onyŋ qorytyndysy boiynşa Ūlttyq komissiia otyrysyna 100-den aspaityn kandidattar tızımı ūsynylady.
Ūlttyq komissiianyŋ otyrysynyŋ qorytyndysymen üzdık 50 kandidat Prezidenttık jastar kadr rezervıne qabyldanady.
Irıkteudıŋ aşyqtyǧy men ädıldıgın qamtamasyz etu maqsatynda kandidattardy baǧalau nätijelerı olardyŋ jeke kabinetınde jäne kezeŋ qorytyndysy boiynşa aqparat resmi saitta jariialanady.
Agenttık töraǧasy el müddesıne qyzmet etemın degen belsendı jas azamattardy Prezidenttık jastar kadr rezervıne qatysuǧa şaqyrdy.
«Bılımdı, eŋbekqor, otanǧa qyzmet etudı paryz sanaityn jastar – elımızdıŋ tūraqty damuynyŋ basty qozǧauşy küşı. Jastardyŋ bılımın, äleuetı men küş-jıgerın el igılıgı üşın tiımdı paidalanu, qoǧamdyq müddelerge negızdelgen käsıbi memlekettık qyzmetşılerdıŋ jaŋa buynyn qalyptastyru – Agenttık jūmysynyŋ basty baǧyttarynyŋ bırı», - dedı Darhan Jazyqbai.
Ūqsas jaŋalyqtar
