AQŞ prezidentı Donald Tramp Resei-Ukraina kelıssözıne Resei prezidentı Vladimir Putin qatysqan jaǧdaida Ystambūlǧa baruǧa daiyn ekenın aitty. Būl turaly CNN jazdy, dep habarlaidy “Adyrna” ūlttyq portaly.
CNN Donald Tramp äkımşılıgındegı joǧary lauazymdy qyzmetkerdıŋ sözın keltırgen. Ol Donald Tramptyŋ Türkiiaǧa baru-barmauy älı de aşyq sūraq ekenın aitqan.
«AQŞ prezidentınıŋ Ystambūlǧa baruy älı aşyq küiınde qalyp otyr, būl köbıne onyŋ reseilık ärıptesı qatysa ma, joq pa — soǧan bailanysty bolady», — dep habarlaidy CNN telearnasy şeneunıktıŋ sözın.
Sondai-aq, Tramptyŋ osy aptada Parsy şyǧanaǧy elderıne — Saud Arabiiasy, Bırıkken Arab Ämırlıkterı jäne Katarǧa sapar şegudı josparlap otyrǧanyn aitty.
Aqparat közıne süiensek, būl — onyŋ ekınşı merzımı bastalǧaly bergı alǧaşqy ırı şeteldık sapary bolmaq. Sonymen qatar AQŞ prezidentı qajet dep tapsa, Türkiiaǧa da baruy mümkın.
Būǧan deiın Donald Tramp 15 mamyr künı Resei men Ukraina arasyndaǧy kelıssözderge qatysu üşın Ystambūlǧa baruy mümkın ekenın mälımdegen. Tramp aldaǧy kezdesudıŋ qaqtyǧysty beibıt jolmen retteu üşın maŋyzdy ekenın atap ötken, dep habarlaidy RT.
Sonymen qatar, Reuters agenttıgınıŋ mälımetınşe, aldaǧy kelıssözderge AQŞ tarapynan Tramptyŋ arnaiy ökılderı Stiv Uitkoff pen Kit Kellog barady. Uitkofftyŋ aituynşa, negızgı talqylanatyn taqyryptar — Kievtıŋ keibır territoriialardan bas tartuy, Zaporoje AES-ın paidalanu jäne Ukrainanyŋ Dnepr men Qara teŋızge qoljetımdılıgı bolmaq.
Esterıŋızge sala keteiık, Vladimir Zelenskii Resei prezidentın beisenbıde Türkiiada kütetının aitqan. Donald Tramp ta beisenbı künı kelıssöz üşın Ystambūlǧa baruy mümkın ekenın aitqan.
Resei taraby äzırge kelıssözge qatysatyn şeneunıkterdıŋ tızımın jariialamady.
