Ystanbulda bolǵan jer silkinisinen 151 adam jaraqat alǵan, qaza tapqandar joq. Bul týraly Túrkııanyń ishki ister mınıstri Alı Erlıkaıa málimdedi, dep habarlaıdy “Adyrna” ulttyq portaly.
“Jer silkinisiniń epıentri Mármár teńizinde, shamamen 7 km tereńdikte, Ystanbuldan 60 km qashyqtyqta ornalasqan”, dep jazady dpa agenttigi.
Olardyń málimetinshe, bul – óńirde sońǵy 25 jylda tirkelgen eń kúshti jer silkinisi.
“Jer silkinisinen keıin birneshe saǵat ishinde 127 aftershok tirkeldi. Olardyń ishindegi eń kúshtisiniń magnıtýdasy 5,9 bolǵan”, dep málimdedi Túrkııanyń IIM basshysy.
«Jer silkinisi qaıtalanýy múmkin»
NTV telearnasyna bergen suhbatynda geolog Okan Tıýısúz aldaǵy ýaqytta taǵy da kúshti jer silkinisi bolýy múmkin ekenin aıtty. Seısmolog Nadjı Górıýr de basty jer silkinisi áli alda bolýy múmkin dep eskertedi. Onyń aıtýynsha, qazirgi jerasty dúmpýleri Mármár teńizindegi, ıaǵnı Ystanbul mańyndaǵy tektonıkalyq plıtalar shekarasyndaǵy kerneýdi odan ári kúsheıtýde.
15 mıllıonnan astam turǵyny bar Túrkııanyń iri megapolısi – Ystanbul jer silkinisine jetkilikti deńgeıde daıyn bolmaǵan.
Óıtkeni, kóptegen turǵyndar jer silkinisi týraly SMS-habarlamalar almaǵan. Mundaı júıe bar bolsa da, onyń tıimdi jumys istemegeni aıtylýda.
