Bıyl Qazaqstan halqy Assambleıasynyń qurylǵanyna 30 jyl tolyp otyr — bul qoǵamdyq ınstıtýt Memleket basshysynyń Jarlyǵymen qurylǵan. Dál osy Almatyda Assambleıany qurý týraly sheshim qabyldanyp, qazaqstandyq ultaralyq kelisim úlgisiniń negizgi qaǵıdattary qalyptasty.
Respýblıkalyq Dostyq úıinde Qazaqstan halqy Assambleıasynyń 30 jyldyǵyna arnalǵan keńeıtilgen otyrys ótti. Qazaqstan Respýblıkasy Prezıdenti Qasym-Jomart Toqaevtyń tapsyrmasy boıynsha Almaty qalasynyń ákimi Erbolat Dosaev «Qazaqstan halqy Assambleıasyna 30 jyl» mereıtoılyq medaldy etnomádenı birlestikterdiń ókilderine, máslıhat depýtattaryna jáne Assambleıa ardagerlerine tabys etti. Olar elimizdegi etnosaralyq kelisimdi damytýǵa aıtarlyqtaı úles qosqan.
«Qazaqstan Respýblıkasy Prezıdenti Qasym-Jomart Kemeluly Toqaev Assambleıanyń halyqtyq dıplomatııanyń biregeı ınstıtýty retinde mańyzdylyǵyn árdaıym atap ótedi. 1995 jylǵy 1 naýryzda Almatyda – Qazaqstan táýelsizdiginiń besigi sanalǵan qalada – Qazaqstan halqy Assambleıasyn qurý týraly Qazaqstan Prezıdentiniń Jarlyǵyna qol qoıyldy. Dál osy qalamyzda keıinnen memlekettik saıasattyń bir bóligine aınalǵan jáne eldiń turaqtylyǵy men damýynyń basty faktoryna aınalǵan ultaralyq kelisim men birliktiń biregeı qazaqstandyq úlgisiniń irgetasy qalandy», - dedi Almaty ákimi Erbolat Dosaev.
Otyrysta sóz sóılegen qala ákimi Erbolat Dosaev Assambleıanyń sońǵy otyz jylda halyq dıplomatııasy men dıalogtyń pármendi ınstıtýtyna aınalǵanyn, «Áralýandyqtaǵy birlik» qaǵıdatyn nyǵaıtyp, jahandyq syn-qater jaǵdaıynda turaqtylyqtyń negizi bolyp otyrǵanyn atap ótti.
Marapattalǵandardyń atynan qatysýshylar joǵary memlekettik baǵa úshin alǵys aıtyp, beıbitshilik, birlik jáne azamattyq biregeılikti nyǵaıtý jolynda jumysyn jalǵastyra beretinin jetkizdi. Baıandamashylar sózinde ultaralyq senim, tarıhı rızashylyq pen rýhanı birlik qundylyqtaryna erekshe nazar aýdardy.
«Qazaq halqynyń qonaqjaılyǵy men meıirimdiligi, sondaı-aq, ózge etnostardyń alǵysy men rızashylyǵy – Assambleıanyń tiregi bolyp tabylatyn dostyq, ózara túsinistik pen ashyqtyqtyń negizi», – dedi «Almaty koreı ulttyq ortalyǵy» qoǵamdyq birlestiginiń tóraǵa orynbasary Georgıı Kan.
Budan keıingi damýdyń mańyzdy baǵyty – etnomádenı birlestikterge arnalǵan zamanaýı ınfraqurylymdy qalyptastyrý bolmaq. Osy rette Almaty qalasynyń ákimi Erbolat Dosaev shaharda jańa Dostyq úıin salý jospary bar ekenin málimdedi.
«Búginde 30-dan astam etnomádenı birlestik Dostyq úıinde belsendi jumys júrgizýde. Biz olardy zamanaýı, mádenı almasý ortalyǵy bolatyn, ashyqtyq pen áralýandyqqa qurmettiń sımvolyna aınalatyn alańmen qamtamasyz etýdi mańyzdy dep sanaımyz», - dedi ol.
Sondaı-aq, ákimniń aıtýynsha, Almatyda qalalyq QHA qoldaýymen tórt ulttyq teatr men jeti etnostyq BAQ redakııasy tabysty jumys istep jatyr. Bul tilder men mádenıetti saqtap, ultaralyq dıalogty nyǵaıtýǵa yqpal etedi.
Erbolat Dosaev azamattyq bastamalar men qazaqstandyq biregeılikti qalyptastyrýǵa baǵyttalǵan jobalarǵa erekshe toqtaldy. Almatyda Assambleıanyń qoldaýymen bilim berý, patrıottyq jáne ekologııalyq bastamalar júzege asyrylyp jatyr. Aksaqaldar men Analar keńesi de belsendi jumys atqaryp otyr. Bıyl qalada Respýblıkalyq aqsaqaldar keńesi men Analar keńesiniń forýmy ótedi.
«Yntymaq» depýtattyq tobymen birlesip, jastardy qoldaý boıynsha birqatar bastama iske qosyldy. Atap aıtqanda, «Qaıratker» jas saıasatker mektebi, «Máslıhat LUB» bilim berý jobasy jáne «Raqmet, Jer-Ana!» ekologııalyq akııasy uıymdastyryldy.
Otyrys barysynda etnomádenı birlestikter men jastar uıymdarynyń ókilderi qoldaý kórsetkeni úshin alǵys aıtyp, Almatynyń qoǵamdyq jáne mádenı bastamalardyń flagmany retindegi rólin atap ótti.
«Jastardyń eń myqty bastamalary dál osy Almatyda bastalady. Bizdiń megapolıs basqa óńirlerge úlgi bolyp otyr», - dedi Almatydaǵy «Assambleıa jastary» RQB ókili Rýstam Qaıryev.
Sóz sońynda Erbolat Dosaev Qazaqstan Prezıdentiniń atynan Assambleıa ókilderine elimizdiń damýyna qosqan úlesi úshin alǵys aıtty. Onyń aıtýynsha, mereıtoılyq marapattar – beıbitshilik, birlik pen ultaralyq úılesim jolynda adal qyzmeti úshin berilgen joǵary memlekettik baǵanyń kórinisi.
